तीनधारे, 03 जून (हि.स.)। विश्व साइकल दिवस २०२६ को अवसरमा रंगटङ्ग पेडलर्स ग्रुपले स्वस्थ जीवनशैली, पर्यावरण संरक्षण तथा सामुदायिक एकतालाई प्रोत्साहन गर्ने उद्देश्यले सामुदायिक साइकल यात्रा आयोजना गरेको छ। कार्यक्रम बिहानै सिलगढीको दार्जिलिङ मोडबाट शुरु भएको थियो, जहाँ शहरका विभिन्न स्थानबाट आएका साइकल यात्रीहरू भेला भए।
यात्रा प्रारम्भ हुनु अघि वरिष्ठ साइकल यात्रीहरूले सहभागीहरूलाई निर्धारित मार्ग तथा सडक सुरक्षा सम्बन्धी जानकारी दिएका थिए। त्यसपछि सहभागीहरू दार्जिलिङ मोडबाट शिवमन्दिर, बागडोगरा, जङ्गली बाबा हुँदै टिपुखोलासम्मको निर्धारित मार्गमा साइकल यात्रा गर्दै पुगे। यात्राको अन्तिम गन्तव्य टिपुखोलामा विशेष सम्मान समारोहको आयोजना गरिएको थियो।
आरपीजी क्लबका अध्यक्ष यादव बन्तवालाई ५५ वर्षको उमेरमा दैनिक १०० किलोमिटर साइकल यात्रा निरन्तर पूरा गरिरहेको उल्लेखनीय उपलब्धिका लागि सम्मान गरियो। उनले यो चुनौती १८ अप्रेल २०२६ देखि शुरु गरेका हुन् र अहिलेसम्म बिना अवरोध निरन्तरता दिइरहेका छन्। वरिष्ठ साइकल यात्री सुरेश भगतले उनको समर्पण, लगनशीलता तथा साइकलप्रतिको प्रतिबद्धताको कदर गर्दै सम्मान पत्र र नेपाली परम्परागत खादा प्रदान गरी सम्मान गरेका थिए।
सहभागीहरूलाई सम्बोधन गर्दै अध्यक्ष बान्तवाले सही साइक्लिङ प्रविधि अपनाउनु पर्ने आवश्यकता रहेको बताए। उनले प्रत्येक साइकल यात्रीले आफ्ना व्यक्तिगत क्षमता र विशेषताहरू पहिचान गरी त्यसको विकास गर्नुपर्ने बताए। साथै उनले निरन्तरता, अनुशासन र दृढ़ संकल्पका साथ साइकल यात्रालाई अघि बढाउन सबैलाई प्रेरित गरे।
कार्यक्रमका संयोजक अविनाश तामाङले पर्यावरण संरक्षण, राम्रो स्वास्थ्य तथा दैनिक जीवनमा साइकल प्रयोगको महत्त्वबारे प्रकाश पारे। उनले साइक्लिङले स्वस्थ समाज निर्माण गर्न र स्वच्छ वातावरण कायम राख्न महत्वपूर्ण योगदान पुर्याउने बताए।
विश्व साइकल दिवसको अवसरमा सहभागी साइकल यात्रीहरूलाई उनीहरूको उत्साह र प्रतिबद्धताको कदर गर्दै मेडल वितरण गरिएको थियो। वरिष्ठ साइकल यात्री बिपिन छेत्रीले पत्रकारहरूलाई सम्बोधन गर्दै विश्व साइकल दिवसको महत्व तथा शारीरिक तन्दुरुस्ती, दिगो यातायात र सामुदायिक सम्बन्ध सुदृढ गर्न साइकलिङको भूमिकाबारे चर्चा गरे।
---------------
हिन्दुस्थान समाचार / हनोक
09 Jun 2026
