कोलकाता, 05 जून (हि.स.)। बंगलादेशमा हादी उस्मानको हत्यामा कथित रूपमा भारतको केन्द्रिय गृह मन्त्रालयको संलग्नता रहेको दाबी गर्दै दिएको विवादास्पद दाबीलाई लिएर ममता ब्यानर्जीविरुद्ध अब कोलकाता पुलिस मुख्यालय लालबजारमा पनि उजुरी दर्ता गरिएको छ। अखिल भारत हिन्दू महासभाले उक्त उजुरी दर्ता गराएको हो।
बिहीबार राति अखिल भारत हिन्दू महासभाले साइबर अपराध शाखामा पश्चिम बंगालकी मुख्यमन्त्री ममता ब्यानर्जीविरुद्ध उजुरी बुझाएको छ। संगठनले उनीविरुद्ध कानुनअनुसार कडा तथा उदाहरणीय कारबाहीको माग गरेको छ।
संगठनका प्रदेश अध्यक्ष चन्द्रचूड गोस्वामीले उजुरीमा आरोप लगाएका छन् कि गत मंगलबार धर्मतल्लास्थित वाई च्यानललाई दिएको बयानका कारण अन्तरराष्ट्रिय स्तरमा भारतको छविमा नकारात्मक असर परेको छ। उक्त बयानका कारण पश्चिम बंगालसहित सम्पूर्ण देशमा साम्प्रदायिक सद्भावमा असर पर्न सक्ने आशंका रहेको पनि उनले बताएका छन्। यस विषयलाई गम्भीर रूपमा लिएर पुलिसले तत्काल अनुसन्धान शुरु गर्नुपर्ने माग गरिएको छ।
उल्लेखनीय छ, ममता ब्यानर्जीले आफ्नो धरना मञ्चबाट बंगलादेशमा हादीको हत्या भएपछि हत्याराहरू भारतको सीमा पार गरेर पश्चिम बंगाल आएको र त्यसपछि उनीहरूलाई पुलिसको स्पेशल टास्क फोर्स (एसटीएफ) ले पक्राउ गरेको दाबी गरेकी थिइन्। उनले संकेत गर्दै केन्द्रिय गृह मन्त्रालयलाई यसबारे सम्पूर्ण जानकारी रहेको पनि बताएकी थिइन्। यस सम्बन्धमा ममता ब्यानर्जीविरुद्ध यसअघि नै सिलगढीमा एउटा एफआईआर दर्ता भइसकेको छ।
---------------
हिन्दुस्थान समाचार / भवानी थामी
09 Jun 2026
