गान्तोक, 09 जून (हि.स.)। सिटिजन एक्सन पार्टी (सीएपी) सिक्किमको चालक कल्याण परिषदले उत्तर सिक्किममा ट्याक्सी चालकमाथि भएको आक्रमणको निन्दा गरेको छ। परिषदले सामाजिक सञ्जालमा लाचुङ क्षेत्रमा एक स्थानीय ट्याक्सी चालकलाई भारतीय सेनाका जवानहरूले निर्दयी रूपमा कुटपिट गरेको भिडियो देखिएको उल्लेख गर्दै उक्त घटनाको निन्दा गरेको छ।
सीएपी चालक कल्याण परिषदका अध्यक्ष आशिष राईले आज प्रेस विज्ञप्तिमा पर्यटकहरू बोकेको ट्याक्सीले अगाडि बढ्नको लागि पास माग्दा उक्त घटना भएको थाहा लागेको बताएका छन्। उनले ट्याक्सीमा एक यात्रु अस्वस्थ रहेकाले उनलाई तत्काल ध्यान दिनुपर्ने आवश्यकता थियो भनी बताएका छन्। उनले चालकलाई गरिएको कथित व्यवहारले सिक्किमका जनता, विशेषगरी चालक समुदायमा व्यापक पीडा र आक्रोश रहेको बताएका छन्।
उनले भनेका छन्, 'सिक्किमका चालकहरू राज्यको पर्यटन उद्योगका मेरुदण्ड हुन् र प्रत्येक वर्ष हजारौं आगन्तुकहरूका लागि सिक्किमका राजदूतको काम गर्छन्। उनीहरूप्रति निर्देशित कुनै पनि हिंसा वा अपमान गहिरो रूपमा विचलित पार्ने र अस्वीकार्य छ।'
उनले सिक्किमका जनताले सधैं भारतीय सशस्त्र बललाई उच्च सम्मान दिँदै आएका छन् र भारतीय सेनालाई विश्वको सबैभन्दा अनुशासित र सम्मानित संस्थाहरू मध्ये एक मान्दै आएको बताएका छन्। यद्यपि, यस प्रकृतिका घटनाहरूले त्यो छविलाई गम्भीर रूपमा धमिलो पार्छन् तथा स्थानीय जनता र सशस्त्र बलहरूबीच रहेको विश्वास र सद्भावलाई कमजोर पार्छन् भनी बताएका छन्।
उनले यस घटनाको कडा निन्दा गर्दै तत्काल, निष्पक्ष र पारदर्शी जॉंचको माग गरेका छन्। उनले भारतीय सेनाका उच्च अधिकारीहरूलाई यस विषयमा छिटो ध्यान दिन र संलग्न कर्मचारीहरूलाई जवाफदेही बनाउन आग्रह गरेका छन्।
हिन्दुस्थान समाचार / बिशाल
09 Jun 2026
