नवादा, २ नोभेम्बर (हि.स.)। प्रधानमन्त्री नरेन्द्र मोदीले यदि बिहारमा फेरि एनडीएको सरकार बन्न सफल भयो भने एक करोड युवाहरूलाई रोजगारी प्रदान गरिनेछ र राज्यभर उद्योगधन्दाको जाल बिछाइनेछ बताएका छन्। उनी आइतबार नवादाको कुन्ती नगर मैदानमा आयोजित एक विशाल जनसभालाई सम्बोधन गर्दै थिए।

प्रधानमन्त्री मोदीले मंचमा उपस्थित सबै एनडीएका उम्मेदवारहरूलाई जिताउन आह्वान गर्दै भने, कांग्रेस र राष्ट्रिय जनता दल (राजद) फेरि बिहारलाई जंगलराजको अवस्थामा धकेल्न खोजिरहेका छन्, त्यसैले बिहारका जनताले सतर्क भई एनडीएलाई भोट दिनुपर्नेछ।

उनले बिहारका पहिलो मुख्यमन्त्री डा. श्रीकृष्ण सिंहको जन्मस्थली नवादालाई स्मरण गर्दै भने, आज बिहार उनका विकास योगदानहरूलाई बिर्सन सक्दैन। मोदीले भने — यदि एनडीए सरकार बन्यो भने कृषि र उद्योग दुवै क्षेत्रमा ठूलो क्रान्ति ल्याइनेछ। एनडीए सरकारले जम्मू–कश्मीरबाट धारा ३७० हटाएर ऐतिहासिक कार्य गरेको छ र ‘अपरेशन सिन्दूर’ मार्फत विरोधीहरूलाई घरमै पुगेर सामना गरेको छ। “मोदीले जे वाचा गर्छ, त्यो पूरा गर्छ,” उनले भने।

प्रधानमन्त्रीले भने, विकसित बिहार बनाउने लक्ष्यका लागि सबैले एकजुट भएर एनडीएलाई समर्थन गर्नुपर्छ ताकि फेरि जंगलराज नफर्कियोस्। उनले भने — “जंगलराजको समयमा नरसंहार र आतंकको वातावरण थियो, सामान्य मानिस घरबाट निस्कन डराउँथे, तर एनडीए सरकारले सुशासन ल्याएको छ।”

मोदीले आरोप लगाए, कांग्रेसले डा. भीमराव आम्बेडकर, बाबू जगजीवन राम र सीताराम केसरीजस्ता महान् व्यक्तिहरूलाई अपमानित गरेको छ, तर भाजपा सधैं आफ्ना पुरखाहरूको सम्मान गर्छ। उनले भने, प्रधानमन्त्री आवास योजनाअन्तर्गत ६० लाख परिवारलाई पक्की घर दिइएको छ। वन र्याङ्क वन पेन्शन अन्तर्गत पूर्वसैनिकहरूलाई एक लाख करोड रुपियाँ वितरण गरिएको छ।

युवाहरूको आत्मनिर्भरता बढाउनका लागि उनले भने, लघु र कुटीर उद्योगहरूको सञ्जाल फैलाइनेछ, साथै बिहारमा टेक्सटाइल र पर्यटन केन्द्रहरू स्थापना गरिनेछ ताकि रोजगारीका अवसर बढून्। गाउँको विकासका लागि सशक्त योजनाहरू लागू गरिने र महिलाहरूलाई आत्मनिर्भर बनाउन रु.१०–१० हजारको सहायता प्रदान गरिएको उनले बताए।

मोदीले भने, “मोदी विकासको ग्यारेन्टी हो। मोदी छ भने सबै कुरा सम्भव छ। एनडीए सरकारले ११ वर्षभित्र सानो किसानहरूका लागि केन्द्रिय कृषि नीति ल्याएको छ, जसअन्तर्गत किसानहरूलाई प्रधानमन्त्री किसान सम्मान निधि अन्तर्गत प्रतिवर्ष रु.६,००० दिइन्छ। यसपालि एनडीए सरकार बनेमा बिहार सरकारले थप रु.३,००० दिनेछ, जसले गर्दा किसानहरूलाई कुल रु.९,००० प्राप्त हुनेछ।'

प्रधानमन्त्रीले भने, बिहार युवाहरूको सबैभन्दा ठूलो राज्य हो र ती युवाशक्तिले एकजुट भएर फेरि एनडीए सरकार बनाउने जिम्मेवारी लिनुपर्छ, ताकि राज्यमा शान्ति र विकास दुवै कायम रहोस्।

यस अवसरमा मन्त्री रेणु देवी, सांसद विवेक ठाकुरलगायत नेताहरू मंचमा उपस्थित थिए। मोदीको भाषणका बीचमा हजारौं दर्शकहरूले “मोदी–मोदी” का नाराहरू लगाउँदै उत्साहपूर्वक स्वागत गरे, जसले गर्दा मोदी भावुक बनेर सबैप्रति आभार व्यक्त गरे।

हिन्दुस्थान समाचार / भवानी थामी