नयाँ दिल्ली, 6 दिसम्बर (हि.स.)। विश्व हिन्दू परिषद (विहिप) ले पश्चिम बंगालको मुर्शिदाबाद जिल्लामा सत्तारूढ़ तृणमूल कांग्रेसका निलम्बित विधायक हुमायूं कबीरद्वारा बाबरी मस्जिदको आधारशिला राखिएको घटनालाई राम जन्मभूमि मन्दिरसम्बन्धी सर्वोच्च न्यायालयको सर्वसम्मत निर्णयको अवहेलना भएको बताएको छ। विहिपका अनुसार, विधायक कबीरले पश्चिम बंगालमा यस मस्जिदको नाममा फेरि हिंसा भड्काउने षड्यन्त्र गरिरहेका छन्।
विहिपका राष्ट्रिय प्रवक्ता विनोद बंसलले शनिबार एक्स पोस्टमार्फत भने, मुर्शिदाबादमा अल्पसंख्यक हिन्दूहरूमाथि भएको आक्रमणलाई नौ महिना पनि पूरा भएको छैन, तर पनि हुमायूं कबीर फेरि बाबरी मस्जिदको नाममा तनाउ उत्पन्न गर्ने प्रयासमा छन्। विधायकले धार्मिक भावनालाई भड्काउँदै कट्टरपन्थी तत्वहरूलाई सक्रिय बनाउने र राजनीतिक लाभका लागि वातावरण बिगार्ने प्रयास गर्दै छन्।
बंसलले चेताउनी दिँदै भने, यदि बाबरी मस्जिदको बहानामा कतै पनि हिन्दूहरूमाथि कुनै आक्रमण हुन्छ भने यसको प्रत्यक्ष जिम्मेवारी हुमायूं कबीर, मुख्यमन्त्री ममता ब्यानर्जी र राज्य प्रशासनले लिनुपर्छ। राम जन्मभूमिसम्बन्धी सर्वोच्च न्यायालयको फैसला अन्तिम सत्य हो र उक्त निर्णयको अवमानना गर्दै देशमा अशान्ति फैलाउने कुनै पनि प्रयास स्वीकार्य हुने छैन।
उनका अनुसार, बंगाल पहिले नै अवैध घुसपैठ तथा कट्टरपन्थी गतिविधिहरूबाट प्रभावित रहेको बेला विधायकको यस्तो कदम राज्यको कानून–व्यवस्थामाथि गम्भीर खतरा हुन सक्छ। राज्य सरकारले तत्काल कड़ा कार्यवाही गर्नुपर्छ भन्दै बंसलले भने, करोड़ौं जनताको आस्थालाई राजनीतिक खेलौनामा परिणत हुन दिनु सकिदैन।
विहिप प्रवक्ताले राज्यपाल र केन्द्रिय गृहमन्त्रालयलाई पनि हस्तक्षेप गर्न अपील गरेका छन्, ताकि स्थिति बिग्रिनु अघि नै यस्ता “उपद्रवी प्रयासहरू” मा रोक लगाइयोस्। प्रशासनले बेलडांगा क्षेत्रमा सुरक्षा व्यवस्था कडा पारेको छ र परिस्थितिमाथि नजिकबाट निगरानी गरिरहेको छ।
---------------
हिन्दुस्थान समाचार / भवानी थामी
07 Dec 2025
