खरसाङ, 19 जुलाई (हि.स.)। तीनधारेमा आदि पत्रकार पाद्री गङ्गाप्रसाद प्रधानको 174औं जन्म जयन्ती समारोह सम्पन्न भएको छ। तीनधारेको स्मृति वनस्थितको प्रेक्षागृहमा आज सन्त जोहन चर्चको आयोजनामा आदि पत्रकार पादरी गंगा प्रसाद प्रधानको 174 औं जन्म जयन्ती पालन गरिएको छ। उक्त कार्यक्रमको अध्यक्षता घैयाबारी ब्लु डायमण्ड अंग्रेजी स्कूलको निर्देशक बीबी थापाले गरेका थिए भने प्रमुख वार्ताकार साहित्यकार एवं शिक्षक युवराज सुन्दास उपस्थित रहेका थिए।

कार्यक्रममा पादरी गंगाप्रसाद प्रधानको जीवनी पास्टर तिरस राईले प्रस्तुत गरेका थिए। कार्यक्रममा प्रमुख वार्ताकार वरिष्ठ साहित्यकार युवराज सुन्दासले पादरी गंगाप्रसाद प्रधानको कष्टदायक जीवन अनि उनले गरेका पत्रकारिताबारे प्रकाश पार्दै पादरी गंगाप्रसादको नेपाली पत्रकारिताको क्षेत्रलाई मात्र पनि हेऱ्यौं भने पनि उनलाई फादर अफ् जर्नलिज्म भन्न सुहाउने बताए। यसका साथै सुन्दासले उनले त्यसताक आफ्नो जीवनकालमा गरेका साहित्य, धार्मिक साथै समाज सेवाको मूल्यांकन गर्नु हो भने उनलाई ब्ल्याक डायमण्ड भन्न सकिने आफ्नो मत प्रकट गरे। साहित्यकार सुन्दासले जसरी कवि भानुभक्तले रामायण तथा आफ्नो रचनाहरूद्वारा तिनताकको नेपाली समाजमा सामाजिक, धार्मिक जागरूकता ल्याए त्यसरी नै पादरी गंगाप्रसादले पनि शैक्षिक, सामाजिक र धार्मिक जागरूकता ल्याए र धर्मले मानिसलाई अनुशासित बनाउँदछ भन्ने विचार व्यक्त गरे।

कार्यक्रममा प्रधान अध्यापिका रूथरानी राईको अगुवाईमा सन्त जोहन चर्चका सदस्याहरूले पादरी गंगाप्रसादद्वारा रचित भजन 'छैन केही स्थिर यो जगमा' प्रस्तुत गरे भने पनु लेप्चा, शिक्षिका कवियत्री उर्मिला लामा, एल्डर मसीह प्रकाश मोक्तान र सुवास बान्तवाले स्वरचित कविता पठन गरे।

हिन्दुस्थान समाचार / हनोक