नयाँ दिल्ली, 08 जून (हि.स)। प्रधानमन्त्री नरेन्द्र मोदीले भारतीय जनता पार्टी (भाजपा) नेतृत्वको राष्ट्रिय जनतान्त्रिक गठबन्धन सरकारको पछिल्लो १२ वर्षको कार्यकालमा भएका विकास कार्यहरूको चर्चा गर्दै यस अवधिमा भारतले धेरै परिवर्तन देखेको बताएका छन्। उनले यी परिवर्तनहरूको केन्द्रमा गरिब, वञ्चित तथा समाजको अन्तिम पंक्तिमा रहेका व्यक्तिहरूको कल्याण रहेको उल्लेख गरेका छन्।
प्रधानमन्त्रीले सोमबार सामाजिक सञ्जाल एक्समा गरेको श्रृंखलाबद्ध पोस्टमा अन्त्योदयको भावनाबाट प्रेरित भएर सरकारले विकासको लाभ दशकौँसम्म वञ्चित रहँदै आएका वर्गसम्म पुर्याउने प्रयास गरेको बताएका छन्। उनले जनधन योजना, प्रत्यक्ष लाभ हस्तान्तरण (डीबीटी), स्वच्छ भारत अभियान, प्रधानमन्त्री आवास योजना, जल जीवन मिशन तथा आयुष्मान भारत जस्ता योजनाहरूको उद्देश्य नागरिकलाई सम्मानजनक जीवन र राम्रो अवसर उपलब्ध गराउनु रहेको बताए।
प्रधानमन्त्रीका अनुसार, गरिब कल्याणका क्षेत्रमा प्रविधिले महत्वपूर्ण भूमिका खेलेको छ। डीबीटी र डिजिटल प्लेटफर्ममार्फत सरकारी सहायता प्रत्यक्ष तथा पारदर्शी रूपमा लाभग्राहीसम्म पुगिरहेको छ। यसले चुहावट घटाएको, कार्यकुशलता बढाएको र शासन व्यवस्थाप्रति जनविश्वासलाई अझ बलियो बनाएको उनले बताए।
उनले गरिब कल्याणको यो यात्रा अब मानव सशक्तीकरणको व्यापक अभियानमा रूपान्तरित भएको उल्लेख गर्दै विकसित भारत निर्माणको संकल्प पूरा गर्ने दिशामा अघि बढिरहेको बताए। सरकारको निरन्तर प्रयास विकासको मूलधारबाट लामो समयसम्म टाढा रहेका नागरिकलाई पनि समान अवसर र सुविधा उपलब्ध गराउनु रहेको उनले बताए।
प्रधानमन्त्री मोदीले विगत १२ वर्षमा लागू गरिएका विभिन्न जनकल्याणकारी योजनाहरूले करोडौँ मानिसहरूको जीवनमा सकारात्मक परिवर्तन ल्याएको र यिनै प्रयासहरू विकसित भारत निर्माणको बलियो आधार बनेको बताए।
---------------
हिन्दुस्थान समाचार / भवानी थामी
09 Jun 2026
