नयाँ दिल्ली, २० अक्टोबर (हि.स.)।

इन्दौरको होलकर स्टेडियममा आइतवार खेलिएको महिला वानडे विश्वकप २०२५ को लिग चरणको खेलमा भारतलाई इङ्ग्ल्यान्डसँग ४ रनले हार बेहोर्नु पर्‍यो। उक्त हारपछि भारतीय कप्तान हरमनप्रीत कौरले उपकप्तान स्मृति मन्धाना को विकेटलाई खेलको टर्निङ्ग पोइन्ट भएको बताइन्।

२८९ रनको लक्ष्य पछ्याउँदै मैदानमा उत्रिएको भारतीय टोलीले सुरुवाती दुई विकेट गुमायो। तर स्मृति मन्धाना र हरमनप्रीत कौरबीचको १२५ रनको साझेदारीले पारी सम्हाल्यो। हरमनप्रीत ३१औँ ओभरमा ७० रनमा आउट भइन् भने स्मृति ४२औँ ओभरमा ८८ रन बनाएर पभेलियन फर्किइन्। स्मृतिको विकेट पतनपछि टोली ढल्कियो र अन्तिम ओभरहरूमा जित हातबाट गुम्यो।

हरमनप्रीतले खेलपछि भनिन्, “स्मृतिको विकेट हाम्रो लागि टर्निङ्ग पोइन्ट थियो। हामीसँग अझै बलिया ब्याटर थिए, तर कसरी खेल हातबाट गयो, बुझिनँ। इङ्ग्ल्यान्डलाई श्रेय जान्छ, उनीहरूले अन्तिमसम्म हार मान्न सकेनन् र निरन्तर विकेट लिँदै गए। जब तपाईले यति मेहनत गर्नुभएको हुन्छ र अन्तिम ५–६ ओभर तपाईको पक्षमा जांदैन, त्यो साँच्चै दुखद हुन्छ।”

यस हारसँगै भारतको सेमिफाइनलमा पुग्ने यात्रा कठिन भएको छ। टोलीलाई लगातार तेस्रो हार भोग्नुपरेको छ।

कप्तानले थप भनिन्, “हामी राम्रो क्रिकेट खेलिरहेका छौं, हार मानिरहेका छैनौं, तर अब लाइन पार गर्नैपर्छ। पछिल्ला तीन खेलमा प्रदर्शन राम्रो थियो, तर जित आउन सकेन। हाम्रा बलरहरूले पनि शानदार काम गरे, विशेषगरी जब हीदर नाइट ब्याटिङ गर्दै थिइन्। अन्तिम पाँच ओभरमा के गल्ती भयो, त्यसमा पुनः सोच्नुपर्छ।”

भारत अब २३ अक्टोबरमा नवी मुम्बईमा न्युजिल्याण्डसँग भिड्नेछ। यो खेल भारतका लागि “गर या मर” जस्तै हुनेछ। यदि भारत न्युजिल्याण्डसँग हार्छ भने उसले बंगलादेशविरुद्धको अन्तिम लिग खेल अनिवार्य जित्नुपर्नेछ र अन्य खेलका परिणाममा पनि भर पर्नुपर्नेछ।

महिला वानडे विश्वकप २०२५

भारत बनाम इङ्ग्ल्यान्ड — इङ्ग्ल्यान्ड ४ रनले विजयी

स्मृति मन्धाना: ८८ रन

हरमनप्रीत कौर: ७० रन

भारतको आगामी खेल: २३ अक्टोबर, न्युजिल्याण्डविरुद्ध (नवी मुम्बई)

-------------

हिन्दुस्थान समाचार / भवानी थामी