गान्तोक, 30 अक्टूबर (हि.स.)। ​सिक्किमका राज्यपाल ओमप्रकाश माथुरले राष्ट्रिय एकता दिवस— सरदार वल्लभभाई पटेलको 150औँ जयन्तीका अवसरमा देश र राज्यवासीहरूलाई हार्दिक शुभकामना व्यक्त गरेका छन्।

राज्यपालले आज जारी आफ्नो सन्देशमा भने, 'भारत एकीकरणका शिल्पी, लौह पुरुष सरदार वल्लभभाई पटेलजीको 150औँ जयन्तीको पावन अवसरमा म देश तथा राज्यका सबै नागरिकहरूलाई शुभकामना व्यक्त गर्दछु।' उनले भने, 'यो दिन हामीलाई सरदार पटेलजीको अद्वितीय नेतृत्व, दूरदृष्टि र राष्ट्रप्रेमको सम्झना गराउँछ, जसले भारतलाई एक सूत्रमा बाँध्नुभयो।'

राज्यपालले आफ्नो सन्देशमा भने, 'सरदार पटेलजीले केवल स्वतन्त्रता सङ्ग्राममा अग्रणी भूमिका निभाउनुभएन, उहाँले स्वतन्त्र भारतको आधारलाई बलियो बनाउन ऐतिहासिक योगदान दिनुभयो। उहाँको दृढ इच्छाशक्ति, प्रशासनिक दक्षता र समावेशी दृष्टिकोण आज पनि हामी सबैका लागि प्रेरणाको स्रोत बनेको छ।'

राज्यपालले सिक्किम जस्तो सीमावर्ती राज्यमा, जहाँ विविधता हाम्रो पहिचान हो, सरदार पटेलको एकताको भावना विशेष रूपमा सान्दर्भिक रहेको बताए। उनले सरदार पटेलका विचारहरू आत्मसात् गर्दै अझ बढी सामाजिक सद्भाव, राष्ट्रिय अखण्डता र विकासको मार्गमा अघि बढ्नुपर्छ भनी आह्वान गरेका छन्।

राज्यपालले यस राष्ट्रिय एकता दिवसमा विकसित भारत @2047 को लक्ष्यसहित हामी भारतको एकता, अखण्डता र विविधतालाई सधैं कायम राख्न प्रतिबद्ध रहनेछौँ भनी संकल्प लिन पनि आह्वान गरेका छन्।

हिन्दुस्थान समाचार / बिशाल