लस एन्जलस, ३० अक्टोबर (हि.स.)। इण्टर मियामीका आठ पटकका ब्यालेन डी’ओर विजेता लियोनेल मेस्सी अहिले पनि मेजर लिग सकर (एमएलएस) का सबैभन्दा बढी तलब पाउने फुटबलर बनेका छन्। लस एन्जलस एफसी (एलएएफसी) का नयाँ स्टार सोन ह्युङ-मिन दोस्रो स्थानमा रहेका छन्। यो तथ्यांक बुधबार सार्वजनिक भएको ताजा तलब सूचीमा उल्लेख गरिएको हो।
मेस्सीलाई इण्टर मियामीबाट वार्षिक २०.४ मिलियन अमेरिकी डलर (झन्डै १७० करोड रुपियाँ) ग्यारेन्टी गरिएको तलब प्राप्त हुन्छ, जुन अन्य खेलाडीहरूभन्दा निकै बढी हो। यस रकममा उनका स्पोन्सर र अन्य व्यावसायिक सम्झौताबाट हुने आम्दानी समावेश गरिएको छैन।
सन् २०२३ को मध्यमा मियामीसँग जोडिएका अर्जेन्टिनी स्टारको हालको सम्झौता यो दिसम्बरमा समाप्त हुँदैछ। त्यसपछि उनी आगामी वर्षदेखि तीन वर्षको नयाँ सम्झौतामा प्रवेश गर्नेछन्। उक्त विस्तारको आर्थिक विवरण हालसम्म सार्वजनिक गरिएको छैन।
३८ वर्षीय मेस्सीलाई हालै रेगुलर सिजनको टप स्कोरर घोषित गरिएको थियो, जहाँ उनले २८ खेलमा २९ गोल गरेका थिए। उनी यस पटक पनि मोस्ट भ्यालुएबल प्लेयर पुरस्कारका प्रबल दाबेदार मानिन्छन्।
दोस्रो स्थानमा रहेका दक्षिण कोरियाका सोन ह्युङ-मिनले एलएएफसीबाट वार्षिक ११.१ मिलियन डलर तलब पाउँछन्। टोटनहम हटस्परका पूर्व कप्तान सोन यस वर्ष अगस्टमा एमएलएस इतिहासकै सबैभन्दा महँगो ट्रान्सफर (२६ मिलियन डलर) अन्तर्गत अमेरिकामा आएका थिए। उनले अहिलेसम्म १० खेलमा ९ गोल गर्दै आफ्नो टिमलाई प्लेअफमा पुर्याउन महत्वपूर्ण भूमिका खेलेका छन्।
तेस्रो स्थानमा इण्टर मियामीकै स्पेनी मिडफिल्डर सर्जियो बुस्केट्स छन्, जसले ८.७ मिलियन डलर तलब पाउँछन् र यो सिजनको अन्त्यपछि संन्यास लिने तयारीमा छन्।
उता, पराग्वेका मिगेल आल्मिरोन (७.८ मिलियन डलर) चौथो र मेक्सिकोका हिर्भिङ “चक्की” लोजानो (७.६ मिलियन डलर) पाँचौँ स्थानमा छन्। दुवैले यस सिजन क्रमशः एटलान्टा युनाइटेड र सैन डिएगो एफसी सँग नयाँ सम्झौता गरेका छन्।
हिन्दुस्थान समाचार / भवानी थामी
