अंकारा (तुर्की), अक्टोबर ३१ (हिस.)। पाकिस्तान र अफगानिस्तानले आज (शुक्रवार) बिहान युद्धविराम जारी राख्ने सहमति जनाएका छन्। दुवै देशका प्रतिनिधिमण्डलबीच इस्तानबुलमा गत शनिबारदेखि सुरु भएको दोस्रो चरणको वार्ता असफल भएपछि मध्यस्थ देश कतार र तुरकीले निरन्तर प्रयास जारी राखेका थिए। यी मध्यस्थ देशहरूको अन्तिम पहलपछि दुवै पक्ष फेरि वार्ताको टेबलमा फर्किए। आज बिहान तुरकीको परराष्ट्र मन्त्रालयले एक्स ह्यान्डलमार्फत संयुक्त वक्तव्य जारी गर्दै पाकिस्तान र अफगानिस्तानले युद्धविराम जारी राख्ने सहमति जनाएको जानकारी दिएको छ।

पाकिस्तानको समाचारपत्र ‘डन’ का अनुसार, यो नयाँ वार्ताको चरणका आयोजक तुरकीको परराष्ट्र मन्त्रालयले आज बिहान संयुक्त वक्तव्य जारी गरेको हो। वक्तव्यमा भनिएको छ, अब आगामी नोभेम्बर ६ मा इस्तानबुलमा फेरि एक महत्वपूर्ण बैठक हुनेछ। यस बैठकमा युद्धविरामको “कार्यान्वयनका थप विधि र प्रक्रिया” माथि छलफल गरी निर्णय लिइनेछ। वक्तव्यका अनुसार, त्यतिन्जेल दुवै देशले शान्ति कायम राख्ने र युद्धविराम उल्लङ्घन गर्ने पक्षमाथि जरिवाना लगाउने उद्देश्यले एक “निगरानी र सत्यापन संयन्त्र” स्थापना गर्नेमा पनि सहमति जनाएका छन्।

वक्तव्यमा भनिएको छ, मध्यस्थका रूपमा तुरकी र कतारले दुवै पक्षको सक्रिय सहभागिताप्रति प्रशंसा व्यक्त गरेका छन् र स्थायी शान्ति तथा स्थायित्वका लागि दुवै देशसँग सहयोग जारी राख्ने बताएका छन्।

उल्लेखनीय छ, तुरकी र कतारका पाकिस्तानसँग गहिरा सम्बन्ध छन्। कतार अफगान तालिबान र नाटो बलहरूबीच वार्तामा प्रमुख भूमिका निर्वाह गरिसकेको देश हो।

स्मरण रहोस्, पाकिस्तान र अफगानिस्तानका प्रतिनिधिमण्डलबीच गत शनिबार इस्तानबुलमा दोस्रो चरणको वार्ता सुरु भएको थियो। इस्लामाबादले काबुलबाट हुने आतङ्कवादी आक्रमणलाई मुख्य मुद्दा बनाएको थियो, तर काबुलले बारम्बार त्यसलाई अस्वीकार गर्‍यो, जसका कारण वार्तामा गतिरोध आयो। चार दिन चलेको वार्तापछि पाकिस्तानका रक्षामन्त्री ख्वाजा आसिफले काबुललाई कडा चेताउनी दिएका थिए। दुवै देशबीच ११ अक्टोबरमा भएको संघर्षपछि युद्ध सुरु भएको थियो। अन्ततः दुवै पक्ष दोहामा पुनः भेटिए र अस्थायी युद्धविराममा सहमत भए। त्यस क्रममा स्थायी शान्ति र स्थायित्वका लागि संयन्त्र तयार गर्न इस्तानबुलमा पुनः भेट्ने सहमति भएको थियो।

गत हप्तादेखि तुरकी र कतारको मध्यस्थतामा दुवै पक्षबीच दोस्रो चरणको वार्ता इस्तानबुलमा सुरु भएको थियो। बुधबार पाकिस्तानका सूचना मन्त्री अताउल्लाह तरारले एक्समा पोस्ट गर्दै वार्तालाई “व्यावहारिक समाधान निकाल्न असफल” भएको बता

एका थिए।

---------------

हिन्दुस्थान समाचार / भवानी थामी