दार्जिलिङ, 04 अक्टोबर (हि.स.)। महात्मा गान्धीको दार्जिलिङ भ्रमणको 100 वर्ष पूरा भएको अवसरमा दार्जिलिङ हिमालयन रेलवेले ‘शताब्दी मार्च’ सुरु गरेको छ। युनेस्कोको विश्व सम्पदा स्थल दार्जिलिङ हिमालयन रेलवेले गर्वका साथ “शताब्दी मार्च” घोषणा गरेको छ, जुन महात्मा गान्धीको 1925 मा दार्जिलिङको ऐतिहासिक भ्रमणको शताब्दी मनाउने एक महिना लामो स्मारक पहल हो।
यो मार्च 5 अक्टोबर, 2025 मा दार्जिलिङ रेलवे स्टेशनबाट सुरु हुने र 9 नोभेम्बर, 2025 मा सिलगढी टाउन स्टेशनमा समापन हुनेछ। पाँच सप्ताहसम्म चल्ने शताब्दी मार्चले डीएचआरमा गान्धीजीको यात्राको मार्गलाई पुन: सम्झना गराउनेछ। प्रतिकात्मक रूपमा एक शताब्दी अघि महात्मा गाँधीको उपस्थिति देखेका स्टेशनहरू र समुदायहरूलाई जोड्नेछ।
जून 1925 मा महात्मा गान्धीले बिरामी देशबन्धु चित्तरञ्जन दासलाई भेट्न दार्जिलिङको यात्रा गरेका थिए, जो एक दूरदर्शी नेता, वकिल, कवि र स्वराज पार्टीका संस्थापक थिए। गान्धीजी 4-9 जून, 1925 सम्म स्टेपमा दाससँगै बसे, जहाँ दुई नेताहरूले स्वतन्त्रता संग्रामको भविष्यको बारेमा महत्त्वपूर्ण छलफल गरेका थिए। यो भेट भारतको स्वतन्त्रता आन्दोलनमा एक महत्त्वपूर्ण क्षण बनेको छ।
दार्जिलिङ हिमालयन रेलवेको निर्देशक कार्यालयबाट प्राप्त जानकारी अनुसार, यो दार्जिलिङ हिमालयन रेलवेले ‘शताब्दी मार्च' 5 अक्टोबरदेखि दार्जिलिङ रेलवे स्टेशनबाट शुरु गरिनेछ। पहिलो दिन दार्जीलिङदेखि घुमसम्म, 11 अक्टोबरको दिन घुमदेखि सोनादा र 12 अक्टोबरको दिन सोनादादेखि टुंगसम्मको यात्रा गरिने भएको छ। त्यसरी नै 18 अक्टोबरमा टुंगदेखि खरसाङ, 19 अक्टोबरमा खरसाङदेखि महानदीसम्म अनि 25 अक्टोबरमा महानदीदेखि घैयाबारीसम्म, 26 अक्टोबरको दिन घैयाबारीदेखि तीनधारे, 1 नोभेम्बरमा तीनधारेदेखि रंगटङ्ग, 2 नोभेम्बरमा रंगटङ्गदेखि सुकनासम्म र 8 नोभेम्बरमा सुकनादेखि सिलगढी जक्शनसम्म र 9 नोभेम्बरमा सिलगढी जक्शनदेखि सिलगढीसम्म आयोजना गरिने भएको छ।
शताब्दी मार्च एक्ट, 'देखो दार्जिलिङ' र 'टिडी' सँगको साझेदारीमा आयोजना गरिँदैछ। गान्धीजीको विरासतको सम्झना गर्नुका साथै मार्चले स्वच्छताको सन्देश बोकेको छ। प्रत्येक स्टेशनमा, 'देखो दार्जिलिङ' सँगको सहकार्यमा प्लगिङ ड्राइभहरू आयोजना गरिनेछ, जबकि टिएडीले फोहोर व्यवस्थापन र पृथकीकरणको निरीक्षण गर्नेछन्, जसले गर्दा पहलले सकारात्मक वातावरणीय प्रभाव छोड्छ।
यो सम्पदा मार्च रेलवेको 200 वर्षको स्मरणोत्सव र डीएचआरद्वारा आयोजित स्टेशन महोत्सव श्रृंखलाको हिस्सा हो। शताब्दी मार्चले इतिहास, समुदाय र दिगोपनलाई मिसाउँछ - महात्मा गान्धीजीको यात्राको सम्मान गर्दै नागरिकहरूलाई सम्पदा संरक्षण र वातावरण संरक्षण गर्न प्रेरित गर्दछ।
हिन्दुस्थान समाचार / हनोक
