नैनीताल, 23 नोभेम्बर (हि.स.)। अल्मोड़ा जिल्लाको भवाली–अल्मोड़ा राष्ट्रिय राजमार्ग 109 को रातिघाट नजिक भएको सवारी दुर्घटनामा तीन शिक्षक नेताहरूको मृत्यु भएको छ भने एक जना घाइतेको उपचार चलिरहेको छ।
शनिबार साँझ हवालबाग क्षेत्रबाट हल्द्वानीमा विवाह समारोहमा सहभागी हुन निस्किएका चार शिक्षक नेताहरू सवार एसयूवी अचानक अनियन्त्रित भएर गहिरो खोंच पार गर्दै शिप्रा नदीमा खसेको थियो। दुर्घटनामा गाडी टुक्राटुक्रा भएको बताइएको छ। गाडीमा सवार तीन शिक्षक, सुरेन्द्र भण्डारी, पुष्कर भैंसोड़ा र संजय विष्टको घटनास्थलमै मृत्यु भएको छ, जबकि मनोज कुमार गम्भीर रूपमा घाइते भएका छन्।
वरपरका स्थानीयवासीहरूले प्रशासनलाई दुर्घटनाको जानकारी दिएका थिए। खैरनाका चौकी प्रभारी हर्ष बहादुर पाल, पुलिस टोली र एसडीआरएफ घटना स्थलमा पुगे। रातभर पुलिस, एसडीआरएफ तथा स्थानीय नागरिकहरूले संयुक्त रूपमा खोज तथा उद्धार अभियान चलाए। डोरीको सहायताले खोंचमा झरी सबै घाइतेहरूलाई सामुदायिक स्वास्थ्य केन्द्र गरमपानी पुर्याइयो, जहाँ चिकित्सकहरूले सुरेन्द्र भण्डारी, पुष्कर भैंसोड़ा र संजय विष्टलाई मृत घोषणा गरे।
सुरेन्द्र भण्डारी राजकीय प्राथमिक शिक्षक संघ हवालबाग ब्लकका महामन्त्री, पुष्कर भैंसोड़ा एजुकेशनल मिनिस्टीरियल अफिसर्स असोसिएशन उत्तराखण्डका प्रदेश अध्यक्ष तथा संजय विष्ट राजकीय प्राथमिक शिक्षक संघ हवालबाग ब्लकका अध्यक्ष रहेको जनाइएको छ। दुर्घटनामा घाइते मनोज कुमारलाई प्राथमिक उपचारपछि चिकित्सकहरूले हल्द्वानी उच्च केन्द्रतर्फ रिफर गरेका छन्।
पुलिस उपाधीक्षक, अपराध तथा यातायात डा. जगदीश चन्द्रका अनुसार, शवहरू खैरनामा सुरक्षित राखिएको छ र परिवारजनलाई जानकारी गराइएको छ। घटनाप्रति समग्र क्षेत्र शोकमा डुबेको छ।
---------------
हिन्दुस्थान समाचार / भवानी थामी
23 Nov 2025
