नयाँ दिल्ली, 5 नोभेम्बर (हि.स.)। भारतीय राष्ट्रिय काँग्रेसका पूर्व अध्यक्ष र लोकसभा विपक्षका नेता राहुल गाँधीले बुधबार नयाँ दिल्लीको इन्दिरा भवनमा आयोजित ‘एच फाइल्स’ नामक पत्रकार सम्मेलनमा हरियाणा निर्वाचनमा ठूलो मात्रामा मत चोरी भएको गम्भीर आरोप लगाएका छन्। उनले हरियाणामा भएको घटना अब बिहारमा पनि दोहोरिन सक्ने आशंका व्यक्त गरेका छन्।

यो पत्रकार सम्मेलन यस्तो समयमा गरिएको हो, जब बिहिबार बिहारमा पहिलो चरणअन्तर्गत १२१ विधानसभा क्षेत्रका लागि मतदान हुने तय छ।

राहुल गाँधीले आरोप लगाउॅंदै भने, हरियाणामा करिब २५ लाख नक्कली मतदाता बनाइएका छन्, जुन ‘सङ्गठित मत चोरी’ को उदाहरण हो। यो कार्य कुनै स्थानीय स्तरमा होइन, उच्च राजनीतिक तहमा नियोजित रूपमा गरिएको हो। उनले भने, हरियाणामा कुल करिब दुई करोड मतदाता छन्, जसमा प्रत्येक आठौँ मतदाता फर्जी छ।

उनले प्रस्तुत गरेका तथ्याङ्क अनुसार, हरियाणामा २५,४१,१४४ नक्कली मतदाता छन्, जसमा ५,२१,६१९ दोहोरो नाम, ९३,१७४ अमान्य ठेगाना, र १९,२६,३५१ सामूहिक (बल्क) मतदाता समावेश छन्। साथै फारम-६ (नाम थप्ने) र फारम-७ (नाम हटाउने) को पनि ठूलो स्तरमा दुरुपयोग भएको उनले बताए। निर्वाचन आयोगले अहिले यी तथ्याङ्क सार्वजनिक हुन नदिएको उनले आरोप लगाएका छन्।

राहुल गाँधीका अनुसार, यति ठूलो मत चोरी हुँदा पनि काँग्रेस पार्टी केवल २२,७७९ मतले मात्र हारेको थियो। निर्वाचन परिणाम पूर्वनियोजित रूपमा प्रभावित गरियो।

पत्रकार सम्मेलनमा उनले ब्राजिलकी एक मोडेलको फोटो देखाउँदै भने, सोही तस्वीरलाई हरियाणाका विभिन्न मतदान केन्द्रहरूमा २२ पटक फरक-फरक नामबाट प्रयोग गरिएको थियो। उनका अनुसार, ती मोडेल कहिले ‘सीमा’, कहिले ‘सरस्वती’ र कहिले ‘स्वीटी’ नामले मतदाता सूचीमा दर्ता छिन्।

गाँधीले भने, हरियाणाका दुई बूथमा एउटै महिलाको फोटो २२३ पटक दोहोरिएको थियो। ‘शशांक गिरी’ नामक व्यक्तिले बूथ नम्बर ४३१ र ५०८ मा १४ पटक मतदान गरे भने ‘रुद्राभिषेक जैन’ र ‘नमन जैन’ नामका दुई दाजुभाइले बूथ १३० र १३१ मा १८ पटक मतदान गरे। उनका अनुसार, निर्वाचन आयोगले चाहे भने एउटै फोटो वा ठेगाना भएका सबै नक्कली मतदाताहरू सजिलै पत्ता लगाउन सक्छ, तर यस्तो कार्य गरिएको छैन।

राहुल गाँधीले पत्रकार सम्मेलनमा हरियाणाका मुख्यमन्त्री नायब सिंह सैनीको भिडियो पनि देखाए, जसमा सैनीले परिणाम आउनु अघि नै भनिरहेका छन् कि “बीजेपीले एकतर्फी सरकार बनाउँदै छ।” गाँधीले यसलाई “साजिशको प्रमाण” भनेका छन्। उनले थपे, काँग्रेसका उम्मेदवारहरूलाई लगातार मतदाता सूचीमा अनियमितता भएको उजुरी प्राप्त भइरहेको थियो।

राहुल गाँधीले भने, “पहिलो पटक यस्तो भयो कि पोस्टल ब्यालट र अन्तिम नतिजा बीच ठूलो अन्तर देखियो। जब हामीले जाँच गर्‍यौं, तब थाहा भयो कि युवाहरूको भविष्य चोरिएको छ।” उनका अनुसार, अहिले यही ढाँचा बिहारमा पनि देखिँदैछ। उनले केही मतदाताहरूलाई मञ्चमा बोलाएर देखाए, उनीहरू र उनका परिवारका नाम अनावश्यक रूपमा मतदाता सूचीबाट काटिएका छन्। राहुल गाँधीले अन्त्यमा भने, “अब भारतमा जेन–जे र युवाहरू नै सत्य र अहिंसाको बाटो अपनाएर लोकतन्त्र बचाउन सक्षम छन्।”

---------------

हिन्दुस्थान समाचार / भवानी थामी