बेङ्गलुरु, 9 नोभेम्बर (हि.स.)। राष्ट्रिय स्वयंसेवक संघ (आरएसएस) का सरसंघचालक डा. मोहन भागवतले यहाँ एक व्याख्यानमालामा धर्म परिवर्तन र राजनीतिक विभाजनमाथि चिन्ता व्यक्त गरे। उनले भने, धर्म परिवर्तन र विभाजन राष्ट्रको लागि खतरा हो। हिन्दूहरूले आफूलाई किन विभाजित गर्नु? राजनीतिले सम्प्रदायको आधारमा विभाजित गर्छ, तर हामीले एकता कायम राख्नुपर्छ। हाम्रो सनातन संस्कृतिको बल एकता र सद्भावमा निहित छ।

संघ प्रमुख आरएसएसको १०० वर्षको यात्रा: नयाँ क्षितिज श्रृंखलाको दोस्रो दिनको व्याख्यानमा सम्बोधन गर्दै थिए। व्याख्यान बेङ्गलुरुको बनशंकरीको होसाकेरेहल्ली रिङ रोडमा रहेको पीईएस विश्वविद्यालयमा आयोजित गरिएको थियो। संघ शताब्दी व्याख्यानमाला श्रृंखलाको दोस्रो दिन प्रश्नहरूको जवाफ दिँदै डा. भागवतले भने, भारतमा धर्म परिवर्तनको तीन शताब्दीको प्रयासको बावजुद, हामी अझै पनि हिन्दुस्तान नै छौं। हाम्रो धर्म र संस्कृति जीवित छ। यसलाई जोगाउनु प्रत्येक नागरिकको जिम्मेवारी हो।

डा. भागवतले सामाजिक एकता र आन्तरिक गुणस्तर देशको विकास, सुरक्षा र यसको संस्कृतिको संरक्षणको लागि आधारभूत शक्ति रहेको बताए। उनले देशको अर्थतन्त्रमा प्रमुख भूमिका खेल्ने एमएसएमई क्षेत्र, कर्पोरेट क्षेत्र, कृषि र स्वरोजगार क्षेत्रहरूको महत्त्वमा जोड दिए। उनले भने, 'यी क्षेत्रहरू देशको जीडीपी र रोजगारी सिर्जनाको मेरुदण्ड हुन्। यिनीहरूको शक्तिलाई अझ बलियो बनाउनु आवश्यक छ।'

भागवतले आणविक इन्धनको सन्दर्भमा भारतले थोरियम अनुसन्धानलाई उच्च प्राथमिकता दिनुपर्ने सुझाउ दिए। उनले भने, 'हामी युरेनियमको विकल्पको रूपमा थोरियमको प्रयोगमा आत्मनिर्भर छौं। यस क्षेत्रमा अनुसन्धानलाई प्रोत्साहन गरिनुपर्छ।' उनले भने, 'आरएसएस न त सरकार हो न त राजनीतिक दल, त्यसैले प्रत्यक्ष कारबाही गर्न सक्दैन, तर हामी जागरूकता सिर्जना गर्न र दबाउ दिन आफ्नो भूमिका खेल्ने छौं।' उनले अझ भने, 'संघको सोच स्वदेशी दर्शन अनुरुप सरकार र समाजमा राष्ट्रिय दृष्टिकोणलाई बलियो बनाउन जारी राखेको छ।'

रोहिंग्या लगायत अवैध आप्रवासीहरूको मुद्दामा सोधिएका प्रश्नहरूको जवाफ दिँदै भागवतले भने, भारतको सिमाना असामान्य रूपमा विभाजित छ। केही ठाउँहरूमा, सीमा असामान्य छ, जहाँ भान्साघर बंगलादेशमा छ र बाथरूम भारतमा छ। मणिपुर सीमा बन्द गर्ने स्थानीय विरोधको जवाफ दिँदै भागवतले सीमाहरू पूर्ण रूपमा सुरक्षित गर्नुपर्ने सल्लाह दिए। सरकारले यस दिशामा प्रयास गरिरहेको छ, तर स्थानीय र सामाजिक कारकहरूलाई ध्यानमा राखेर कारबाही गर्नुपर्छ भनी उनले बताए।

राष्ट्रिय स्वयंसेवक संघको शताब्दी वर्षको उपलक्ष्यमा संघको सय वर्षको यात्रा: नयाँ क्षितिज विषयमाथि आयोजित दुई दिवसीय व्याख्यानमालामा आरएसएसका सरकार्यवाह दत्तात्रेय होसबोले, जिल्ला संघचालक डा. पी. वामन शेनोय, र कर्नाटक दक्षिण प्रान्त संघचालक जी.एस. उमापति मञ्चमा उपस्थित थिए।

हिन्दुस्थान समाचार / भवानी थामी