गान्तोक, 07 मार्च (हि.स.)। राज्य खाद्य तथा नागरिक आपूर्ति विभागका मन्त्री भोजराज राईले बिहिवार राजधानीको टाशीलिङ सचिवालयमा राज्यका सबै 6 जिल्लाका खाद्य तथा नागरिक आपूर्ति विभाग, एलपीजी वितरकहरू र पेट्रोलियम पम्प डिलरहरूसॅंग आयोजित बैठकको अध्यक्षता गरे। बैठकमा खाद्य तथा नागरिक आपूर्ति विभागका सचिव-प्रभारी तेन्जिङ टी. काल्योन, एसटीसीएसका एमडी टार्जन सुब्बा, विधिक माप विज्ञान एकाई एवं उपभोक्ता संरक्षण प्रकोष्ठ र एसटीसीएसका वरिष्ठ अधिकारीहरू उपस्थित थिए।
उक्त बैठक गत 25 फरवरीका दिन एलपीजी, डिजल र पेट्रोलसँग सम्बन्धित विषयहरूलाई सम्बोधन गर्न आईओसीएल, एचपीसीएल र बीपीसीएलका तेल मार्केटिङ कम्पनीहरूसँग आयोजित समन्वय बैठकको निरन्तरता रहेको विज्ञप्तिमा उल्लेख छ।
बैठकमा मन्त्रीले राज्यको एलपीजी आपूर्ति प्रणालीलाई बलियो र भरपर्दो वितरण प्रणाली बनाउन सुधार आवश्यक रहेको बताए। यस सन्दर्भमा उनले सबै एलपीजी वितरकहरूलाई बिक्री गर्नुअघि ग्राहकहरूलाई एलपीजी सिलिन्डर रिफिलको तौल प्रदर्शन गर्न, तेल कम्पनीले सूचित गरेको दर मात्र लिन र सबै शुल्कहरूको लागि विस्तृत नगद मेमो जारी गर्न निर्देश दिए।
उनले अवैध आप्रवासीहरूका कारण एलपीजीको बढ्दो कालोबजार मागमा योगदान पुर्याइरहेको बताउॅंदै वितरकहरूलाई यस्तो अवैध बिक्री तुरुन्तै बन्द गर्न निर्देश दिए। कालोबजारीले अभावलाई बढाउँछ र वैध बासिन्दाहरूलाई आवश्यक आपूर्तिहरू पहुँच गर्न गाह्रो बनाउँछ भनी बताए। यसैगरी, उनले आगामी मनसुन मौसमलाई ध्यानमा राख्दै एलपीजी र पेट्रोलियमको पर्याप्त स्टक सुनिश्चित गर्न सरोकारवालाहरूलाई निर्देश दिए।
बैठकमा सबै एलपीजी वितरकहरूलाई सिङ्गल बटल कनेक्शनलाई डबल बटल कनेक्शनमा रूपान्तरणलाई सक्रिय रूपमा प्रवर्द्धन गर्न निर्देश दिइएको छ। ग्राहकहरूलाई दुईवटा सिलिन्डर उपलब्ध गराउनु पर्ने र यसले मनसुन अवधिमा सम्भावित आपूर्ति अवरोधहरूको प्रभावलाई कम गर्न मद्दत गर्ने बताइयो।
यसैगरी, राज्यका मुख्यमन्त्रीको विचार अनुरूप मन्त्री राईले सबै पेट्रोल पम्प डिलरहरूलाई पुरुष र महिला दुवैका लागि स्वच्छ शौचालय र ग्राहकहरूका लागि सफा पानीको व्यवस्था सुनिश्चित गर्न निर्देश दिए। उनले एलपीजी वितरक र पेट्रोल पम्प डिलरहरूले सरकारको निर्देशन पालना नगरेमा कारबाहीको कडा चेताउनी पनि दिएका छन्।
हिन्दुस्थान समाचार / बिशाल
