नयाँ दिल्ली, 07 मार्च (हि.स.)। भारतका सर्वकालिक सर्वाधिक गोलकर्ता तथा पूर्व कप्तान सुनील छेत्रीले अन्तरराष्ट्रिय फुटबलबाट सन्यास तोडेर आगामी मार्चमा हुने अन्तरराष्ट्रिय विन्डोमा मालदीव र बांग्लादेश विरुद्ध खेल्ने निर्णय गरेका छन्।
40 वर्षीय छेत्रीले गत वर्ष जूनमा फीफा वर्ल्ड कप 2026 क्वालिफायरमा कुवैत विरुद्ध गोलरहित ड्र खेलेपछि अन्तरराष्ट्रिय फुटबलबाट सन्यासको घोषणा गरेका थिए।
94 अन्तरराष्ट्रिय गोलका साथ उनी पुरुष फुटबलमा सर्वकालीन सर्वाधिक गोलकर्ताहरूको सूचीमा क्रिस्टियानो रोनाल्डो, लियोनेल मेस्सी र अली डेईपछि चौथो स्थानमा छन्। यद्यपि, उनले इन्डियन सुपर लिग (आईएसएल) मा बेङलुरु एफसीबाट खेल्न जारी राखे र 12 गोल गर्दै यस सिजनमा लिगको शीर्ष भारतीय गोलकर्ता बने।
सन्यासपछि छेत्रीले स्पष्ट गरेका थिए, 'सन्यास लिने निर्णय शारीरिक कारणले थिएन। म अझै पनि फिट छु, दौडिरहेको छु, बचाउ गरिरहेको छु र कडा परिश्रम गरिरहेको छु। यो निर्णय मानसिक पक्षसँग सम्बन्धित थियो।'
एएफसी एशियन कप 2027 छनोटमा भारतलाई बांग्लादेश, हङकङ (चीन) र सिंगापुरसँगै समूहमा राखिएको छ। भारतले यस महिना आफ्नो अभियानको शुरुवात 19 मार्चमा शिलोङको जवाहरलाल नेहरू रंगशालामा मालदीव विरुद्धको मैत्रीपूर्ण खेलबाट गर्नेछ, त्यसपछि तेस्रो चरणको छनोटमा बांग्लादेशको सामना गर्नेछ।
भारतीय टोलीका मुख्य प्रशिक्षक मनोलो मार्केजले बिहिवार एक विज्ञप्तिमा भने, 'एशियन कपको लागि छनोट हुनु हाम्रो लागि धेरै महत्त्वपूर्ण छ। प्रतियोगिताको महत्त्व र आगामी खेलहरूलाई ध्यानमा राख्दै, मैले सुनिल छेत्रीसँग फर्कने बारेमा छलफल गरे। उनी सहमत भए, त्यसैले हामीले उनलाई टोलीमा समावेश गरेका छौं।'
हिन्दुस्थान समाचार / भवानी थामी
