बीजिङ, 14 जुलाई (हि.स.)। भारतका विदेशमन्त्री डा. एस. जयशंकर चीनको राजधानी बीजिङ पुगेका छन्। बीजिङ पुगेलगत्तै उनले चिनियाँ उपराष्ट्रपति हान झेङसॅंग भेट गरे। जयशंकरले एक्स पोस्टमा बैठकको तस्बिर साझा गर्दै लेखेका छन्, 'आज बीजिङ आइपुगेपछि उपराष्ट्रपति हान झेङलाई भेट्न पाउँदा म खुशी छु। चीनको एससीओ अध्यक्षताको लागि भारतको समर्थन व्यक्त गरें।'

विदेशमन्त्री जयशंकरले लेखेका छन्, 'यस बैठकमा द्विपक्षीय सम्बन्ध सुधारमा ध्यान केन्द्रित गरियो।' उनले आफ्नो भ्रमणले सकारात्मक दृष्टिकोण विकास गर्ने विश्वास व्यक्त गरेका छन्। सिंगापुरबाट बीजिङ आइपुग्नुअघि उनले आइतवार उपप्रधानमन्त्री गेन किम योङलाई भेटेका थिए। उनले तेस्रो भारत-सिंगापुर मन्त्रीस्तरीय गोलमेच सम्मेलनको लागि आफू उत्सुकतापूर्वक प्रतिक्षा गरिरहेको बताए। जयशंकरले सिंगापुरसँगका विभिन्न द्विपक्षीय पहलहरू निरन्तर अगाडि बढिरहेको बताए।

यसअघि जयशंकरले आफ्ना समकक्षी विवियन बालकृष्णनलाई भेटेका थिए। जयशंकरले भने, 'सिंगापुर हाम्रो एक्ट इस्ट नीतिको केन्द्रमा छ।' बैठकको बारेमा बोल्दै बालकृष्णनले एक्स पोस्टमा लेखे, 'विश्व बहुध्रुवीयता तर्फ अघि बढ्दै जाँदा, भारतले अवसरका यी प्रमुख ध्रुवहरू मध्ये एकको रूपमा बढ्दो रूपमा महत्त्वपूर्ण भूमिका खेल्नेछ।'

उल्लेखनीय छ, चीन भ्रमणको क्रममा विदेशमन्त्री जयशंकरले तियानजिनमा हुने शंघाई सहयोग संगठन (एससीओ) सम्मेलनमा भाग लिनेछन्।

हिन्दुस्थान समाचार / भवानी थामी