गेजिङ, 28 जुलाई (हि.स.)। राज्य पर्यटन एवं नागरिक उड्डयन विभाग मन्त्री टीटी भोटियाले आज योक्सम टाशीडिङ निर्वाचन क्षेत्रको लबिङमा ‘इकोस्कल्प्ट’ प्लास्टिक फोहोर अपसाइक्लिङ एकाइको औपचारिक उद्घाटन गरे। उनले यस एकाईको सञ्चालनको शुरुवात गर्दै एकाइको आधिकारिक लोगो पनि सार्वजनिक गरे।

‘इकोस्कल्प्ट’ एक समुदाय-आधारित पहल हो, जसको उद्देश्य स्थानीय रोजगारीका अवसरहरू सिर्जना गर्दै पर्यावरणीय दिगोपनलाई प्रवर्द्धन गर्न 'प्लास्टिक फोहोरलाई कलामा रूपान्तरण' गर्नु हो। यो परियोजना मन्त्री भोटियाको सक्रिय सहयोगमा मुख्यमन्त्रीको विवेकाधिकार कोष अन्तर्गत वित्त पोषित छ। एकाइले निकट भविष्यमा ठूलो मात्रामा उत्पादनको लागि आफ्नो क्षमता विस्तार गर्ने लक्ष्य राखेको छ।

मन्त्री भोटियाले आफ्नो सम्बोधनमा पर्यावरणीय चेतना र नवाचारको लागि पहलको प्रशंसा गरे। उनले राज्य सरकारबाट पूर्ण समर्थनको आश्वासन दिॅंदै आफ्नो व्यक्तिगत रूपमा पनि यस्ता हरित पहलहरूलाई अगाडि बढाउन प्रतिबद्धता व्यक्त गरे। उनले मुख्यमन्त्री प्रेमसिंह तामाङको गतिशील नेतृत्वमा राज्य सरकारका विभिन्न पर्यावरणीय पहलहरूमाथि पनि प्रकाश पारे।

राज्य सरकारका कार्यक्रमहरूमाथि प्रकाश पार्दै मन्त्रीले 'एक परिवार, एक उद्यमी' योजना, पर्यटन तथा नागरिक उड्डयन विभाग अन्तर्गत सिक्किम इन्स्पायर्स कार्यक्रम, र उद्यमीहरूका लागि सीप विकास र वित्तीय सहयोग सहित वाणिज्य तथा उद्योग विभाग अन्तर्गत उपलब्ध विभिन्न अवसरहरूको बारेमा जानकारी गराए। उनले एक परिवार, एक उद्यमी, सिक्किम इन्स्पायर्स जस्ता धेरै युवा-केन्द्रित कार्यक्रमहरूको बारेमा पनि जानकारी गराए।

उनले परम्परागत सरकारी नोकरीहरूभन्दा उद्यमशीलताको महत्त्वमा जोड दिँदै यी सरकार समर्थित योजनाहरू र तालिम कार्यक्रमहरूको फाइदा उठाउन युवाहरूलाई प्रोत्साहित गरे। उनले नवोदित र अवस्थित उद्यमीहरूका लागि एमएसएमई र सीड सेल मार्फत उपलब्ध सहयोगको पनि उल्लेख गरे।

यसअघि, इकोस्ल्प्टकी संस्थापक सदस्य लक्ष्मी लिम्बूले एकाइको उद्देश्य र कार्यप्रणालीको बारेमा जानकारी गराएकी थिइन्। एकाइले हाल चार स्थानीयहरूलाई रोजगारी दिइरहेको बताउॅंदै उनले अफिस ब्याग, ल्यापटप ब्याग, घरायसी सामान कन्टेनर र म्याटहरूसहित विभिन्न प्रकारका पर्यावरणमैत्री उत्पादहरू उत्पादन गरिरहेको बताइन्।

हिन्दुस्थान समाचार / बिशाल