कोलकाता, 30 अगस्त (हि.स.)। मुर्शिदाबाद जिल्लाको बेलडांगा क्षेत्रमा साइबर ठगीको लागि प्रयोग भइरहेको फालिएको सिम कार्डको कालो बजारको खुलासा गर्दै पुलिसले दुई टाउकेलाई पक्राउ गरेको छ। पक्रा पर्ने आरोपीहरूमा बुरहान शेख र उसको आफ्नै भाइ आसिफ इकबाल सामेल छन्।

शनिवार प्रेस कन्फ्रेन्स आयोजना गरी मुर्शिदाबाद जिल्ला पुलिसले बतायो, आरोपीहरूबाट 311 वटा नक्कली सिम कार्ड र चार वटा पुरानो किप्याड मोबाइल फोन जफत गरिएको छ। बेलडांगा थानाको पुलिसले गए शुक्रवार अबेर राती झुनका क्षेत्रबाट मास्टरमाइण्ड आसिफ इकबाललाई समात्यो, त्यसको लगत्तैपछि उसको भाइ बुरहान शेखलाई पनि समात्यो। गिरोहले स्थानीय मानिसहरूबाट अफरमा पाइने सस्तो सिम कार्ड भेला गर्दथ्यो।

एक महिनाको वैधता पूरा भएपछि मानिसहरूले यसलाई फाल्थे भने आरोपीहरूले त्यसलाई एकत्र गरेर जानकारी जुटाउँथे अनि पछि ठूलो मूल्यमा साइबर ठगहरूलाई बेच्थे। दुवैसित जाँचबुझ गरी पुलिसले यो पत्तो लगाउने चेष्टा गरिरहेको छ, यी सिम कार्डहरूको सप्लाई कहाँ-कहाँ हुन्थ्यो र यसको पछाड़ि को-को सामेल छ।

बेलडांगाका एसडीपीओ उत्तम गड़ाईले बताए, क्षेत्रका केही मानिसहरूले सस्तो सिम प्रयोग गरी फाल्थे जसलाई आरोपीहरूले भेला गरेर साइबर ठगहरूसम्म पुऱ्याउँथे। यी कार्डहरूको प्रयोग गरी राज्य बाहिर पनि धोकाधड़ी गरिन्थ्यो। पुलिसले शंका व्यक्त गरेको छ, यसपूर्व पनि ठूलो संख्यामा सिम कार्ड यस नेटवर्कको माध्यमबाट बेचिसकिएको छ।

हिन्दुस्थान समाचार / उष्णता छेत्री शर्मा