नयाॅं दिल्ली, २८ सेप्टेम्बर (हि.स.)। दिल्ली पुलिसले स्वामी चैतन्यानन्द सरस्वती उर्फ पार्थ सारथीलाई शनिबार राति आग्राबाट पक्राउ गरेको छ। उनले आर्थिक रूपमा कमजोर वर्गका छात्रवृत्ति अन्तर्गत पीजीडीएम पाठ्यक्रम अध्ययन गरिरहेका छात्राहरूलाई यौन शोषण गरेको आरोप लागेको छ।
दक्षिण-पश्चिम जिल्ला पुलिस उपायुक्त अमित गोयलले आइतवार जानकारी दिँदै भने, दिल्ली पुलिसले शनिबार राति चैतन्यानन्दलाई आग्रास्थित एक होटलबाट पक्राउ गरेको हो। टोली उनलाई लिएर दिल्ली प्रस्थान गरिसकेको छ र आज अदालतमा पेश गरिनेछ।
उल्लेखनीय छ, चैतन्यानन्द सरस्वती उर्फ पार्थ सारथीमाथि छात्राहरूलाई यौन उत्पीडन गरेको गम्भीर आरोप लागेको छ। यस प्रकरणमा फरार रहँदै आएका उनको ट्रस्टसँग सम्बन्धित १८ वटा ब्याङ्क खाता र २८ वटा फिक्स डिपोजिट खाता पुलिसले फ्रीज गरिसकेको छ, जसमा करिब ८ करोड रुपैयाँ थियो। साथै, उनका डेबिट र क्रेडिट कार्ड पनि बन्द गराइएका छन्।
जानकारी अनुसार, दिल्लीको वसन्तकुञ्जस्थित एक आश्रम शाखाका निर्देशकमाथि १५ भन्दा बढी छात्राले यौन शोषण र छेडछाडको उजुरी दिएका थिए। ४ अगस्टमा वसन्तकुञ्ज उत्तर पुलिस चौकीमा संस्थानका एक प्रशासकमार्फत उजुरी दर्ता भएको थियो, जसमा ईडब्ल्यूएस छात्रवृत्ति अन्तर्गत अध्ययनरत छात्राहरूलाई यौन उत्पीडन गरिएको उल्लेख गरिएको थियो।
पुलिसका अनुसार, अनुसन्धानका क्रममा ३२ छात्राहरूका बयान दर्ता गरिएको छ, जसमा १७ जनाले उनीहरूलाई अपमानजनक भाषा प्रयोग, अश्लील व्हाट्सएप/एसएमएस पठाउने तथा अवाञ्छित शारीरिक सम्पर्क गरेको गुनासो गरेका छन्। साथै, संकाय तथा प्रशासनमा कार्यरत महिलाहरूले समेत आरोपीको मागलाई पूरा गर्न उक्साएको र दबाउ दिएको आरोप छ।
---------------
हिन्दुस्थान समाचार / भवानी थामी
