बामाको (माली), १४ जनवरी (हि.स.)। उत्तर मालीको टिम्बकटू क्षेत्रमा नाइजर नदीमा एक फेरी डुङ्गा चट्टानसँग ठोक्किएर डुबेको छ, जसमा दर्जनौँ मानिसको ज्यान गएको छ। स्थानीय अधिकारी तथा मृतकका आफन्तहरूले मंगलबार यसबारे जानकारी दिएका छन्।
अधिकारीहरूका अनुसार, उक्त दुर्घटना डिरे शहरमा बिहिबार भएको हो। हालसम्म स्थानीय प्रशासनले मृतकको आधिकारिक संख्या सार्वजनिक गरेको छैन। तर, स्थानीय बासिन्दा तथा पूर्व राष्ट्रिय सभाका उप–सांसद अल्काइदी टेरेका अनुसार, यस दुर्घटनामा ३८ जनाको मृत्यु भएको छ भने २३ जनालाई सकुशल उद्धार गरिएको छ।
अमेरिकाको एबीसी न्युज च्यानलको रिपोर्टअनुसार, डिरे निवासी मूसा अग अल्मोबारक ट्राओरेले यस दुर्घटनामा आफ्नो परिवारका २१ सदस्य गुमाएको बताएका छन्।
केही प्रत्यक्षदर्शीहरूका अनुसार, डुङ्गामा किसानहरू सवार थिए। दुर्घटना रातिको समयमा भएको थियो। उक्त क्षेत्रमा अल–कायदा सम्बन्धित आतङ्कवादी आक्रमण रोक्न सुरक्षा कारणले राति डकिङमा प्रतिबन्ध लगाइएको छ। ट्राओरेका अनुसार, डुङ्गाका चालकले बिहानसम्म पर्खन चाहेनन् र अर्को स्थानमा किनार लाग्ने प्रयास गर्दा डुङ्गा चट्टानसँग ठोक्किएर डुबेको हो।
मालीले छिमेकी देश बुर्किना फासो र नाइजरसँग मिलेर दशकौँदेखि आतङ्कवादविरुद्ध संघर्ष गर्दै आएको छ। अल–कायदा समर्थित जमात नुसरत अल–इस्लाम वल–मुस्लिमीन समूहका आतङ्कवादीहरू मालीको टिम्बकटू क्षेत्रमा सक्रिय रहेका छन्। नाइजर नदीमा फेरी डुङ्गासम्बन्धी दुर्घटनाहरू सामान्य रूपमा हुने गरेका छन्।
हिन्दुस्थान समाचार / भवानी थामी
