गान्तोक, 17 जनवरी (हि.स.)। गान्तोक जिल्ला प्रशासनद्वारा सञ्चालित साप्ताहिक निरीक्षण अभियानको क्रममा आज एसडीएम (मुख्यालय) अभिजीत आर. पाटिलको नेतृत्वमा यहॉंको देवराली बजारमा संयुक्त निरीक्षण सम्पन्न गरियो। अभियान अवधि कुल १६ प्रतिष्ठानहरूको निरीक्षण गरिएको बताइएको छ।
निरीक्षणको उद्देश्य पेट्रोल पम्प, रेस्टुरेन्ट, मासु दोकान र अन्य खुद्रा दोकानहरूसहित विभिन्न व्यावसायिक प्रतिष्ठानहरूद्वारा खाद्य सुरक्षा मापदण्ड, अग्नि सुरक्षा अनुपालन, अन्य वैधानिक र कानुनी आवश्यकताहरूको पालनाको मूल्याङ्कन गर्नु थियो।
निरीक्षणको क्रममा खाद्य सुरक्षा मापदण्ड, उत्पाद शुल्क अनुपालन, सरसफाई मापदण्ड, प्याकेज गरिएका वस्तु नियमहरू, र वैधानिक कागजातहरूको सन्दर्भमा धेरै कमजोरीहरू अवलोकन गरिएको बताइएको छ। निरीक्षण टोलीले विद्यमान नियम र विनियमहरू अनुसार सम्बन्धित विभागहरूद्वारा डिफल्टर प्रतिष्ठानहरू विरुद्ध सूचना जारी गर्ने, जफत गर्ने र प्रारम्भिक चेताउनीहरू सहित उपयुक्त कारबाहीहरू गरेको छ।
यसबाहेक, शहरी विकास विभागले धेरै प्रतिष्ठानहरू व्यक्तिहरूको नाममा जारी गरिएको व्यापार अनुमतिपत्रमा सञ्चालन भइरहेको पायो, जबकि सम्बन्धित जीएसटी पञ्जीकरणहरू कम्पनी वा ब्रान्डको नाममा थिए, जुन व्यापार अनुमतिपत्र नियम, २०११ को उल्लङ्घन हो। यस सम्बन्धमा बजार अधिकारीले मार्च २०२६ मा हुने ट्रेड लाइसेन्स नवीकरण हुनुभन्दा पहिले कम्पनी वा ब्रान्ड नाम अन्तर्गत सञ्चालित सबै दोकान, रेस्टुरेन्ट र होटलहरूलाई तुरुन्तै गडबडी सच्याउन सल्लाह दिइएको छ।
जिल्ला प्रशासनले सार्वजनिक सुरक्षा, उपभोक्ता संरक्षण र नियामक अनुपालन सुनिश्चित गर्ने आफ्नो प्रतिबद्धता दोहोर्याउॅंदै यस्तो संयुक्त निरीक्षण नियमित रूपमा जारी रहने जानकारी गराएको छ।
हिन्दुस्थान समाचार / बिशाल
