प्रयागराज (उत्तर प्रदेश), १८ जनवरी (हि.स.)। बंगलादेशमा हिन्दु मात्र होइन, गैर–मुस्लिम समुदाय पनि उत्पीडनमा परिरहेका छन्। विश्व मानवअधिकार समुदाय यस विषयमा मौन बसेको छ। यस्तो अवस्थामा केन्द्रको मोदी सरकारले अगाडि बढेर आवाज उठाउनुपर्ने आवश्यकता छ। आवश्यक परेमा सनातनीहरूको सुरक्षाका लागि सेना पठाउन पनि हिच्किचाउन नहुने विचार व्यक्त गरेका छन्। उक्त कुरा आइतबार मौनी अमावस्याको अवसरमा माघ मेलास्थित शंकराचार्य मार्गको शिविरमा ‘हिन्दुस्थान समाचार’ सँग कुराकानी गर्दै काशी सुमेरु पीठाधीश्वर जगद्गुरु शंकराचार्य स्वामी नरेन्द्रानन्द सरस्वतीले भनेका हुन्।
उनका अनुसार, बंगलादेशमा सनातनीहरूको जनसंख्या लगभग एक करोड़ दस लाख छ। उनीहरूको अस्तित्व सुरक्षित राख्न लगभग पाँच लाख सशस्त्र व्यक्तिहरू तयार गर्नुपर्ने अवस्था आएको उनले दाबी गरे। हिन्दुहरूसँगै बंगलादेशमा बसोबास गर्ने गैर–मुस्लिम समुदायका इसाई, यहूदी, बौद्ध लगायत सबै अल्पसंख्यकहरू खुला रूपमा उत्पीडनमा परिरहेका छन्। सबै पीडित छन्, तर अमेरिका, रूस, चीनजस्ता शक्तिशाली राष्ट्रहरू समेत मौन बसेका छन्। विश्व मानवअधिकार समुदायको मौनता पनि चिन्ताजनक रहेको उनले बताए।
शंकराचार्य स्वामी नरेन्द्रानन्द सरस्वतीले केन्द्र सरकारलाई चेताउनी दिँदै भने, यदि हिन्दु र सनातनीहरूको सुरक्षाका लागि सेना पठाएर तत्काल कदम चालिएन भने विश्वभरिका सनातन धर्मका रक्षक मानिने नागा सन्यासी, साधु–सन्तहरू बंगलादेशतर्फ कूच गर्न बाध्य हुनेछन्।
---------------
हिन्दुस्थान समाचार / भवानी थामी
