प्रयागराज (उत्तर प्रदेश), १८ जनवरी (हि.स.)। विश्वप्रसिद्ध प्रयागराज माघ मेलाको तेस्रो महत्वपूर्ण स्नान पर्व मौनी अमावस्याको पावन स्नान शुभ मुहूर्तमा मौन व्रतसहित सुरु भएको छ। संगम तटसम्म पुग्ने सातै मार्गहरूमा श्रद्धालुहरूको ठूलो भीड देखिएको छ। सुरक्षा व्यवस्थालाई ध्यानमा राख्दै पुलिस तथा प्रशासनिक अधिकारीहरूले सीसीटीभीमार्फत निरन्तर निगरानी गरिरहेका छन्।
मौनी अमावस्या पर्वको अवसरमा पतित पावनी माता गंगा, यमुना तथा अन्तःसलीला सरस्वतीको पावन संगममा ब्रह्म मुहूर्तदेखि नै श्रद्धालुहरूले मौन व्रत धारण गर्दै आस्थाको डुबकी लगाई पूजा–अर्चना गरी पुण्य अर्जन गरिरहेका छन्।
श्रद्धालुहरूको भीडलाई नियन्त्रणमा राख्न संगमका सबै घाटहरूमा स्नान सम्पन्न भएपछि जल पुलिसका जवानहरू तथा पुलिस विभागका अधिकारीहरूले माइकमार्फत घाट खाली गर्न निरन्तर आग्रह गरिरहेका छन्। सुरक्षा दृष्टिले कडा र व्यापक व्यवस्था गरिएको छ।
यस पावन अवसरमा प्रयागराजका पुलिस आयुक्त जोगेन्द्र कुमार सिंह, मण्डल आयुक्त सौम्या अग्रवाल, जिल्ला अधिकारी मनीष कुमार वर्मा, माघ मेला प्रहरी अधीक्षक नीरज कुमार पाण्डेयसहित सबै प्रहरी तथा प्रशासनिक अधिकारीहरू सीसीटीभीमार्फत निरन्तर निगरानी गर्दै सुरक्षा कर्मीहरूलाई आवश्यक निर्देशन दिइरहेका छन्।
---------------
हिन्दुस्थान समाचार / भवानी थामी
