रामेश्वरम, १८ जनवरी (हि.स.)।
तमिलनाडुको रामनाथपुरम जिल्लास्थित रामेश्वरममा रहेको रामनाथस्वामी मन्दिरमा आज थाई अमावस्याको अवसरमा ठूलो संख्यामा श्रद्धालुहरू पुगेका छन्। श्रद्धालुहरूले अग्नि तीर्थ समुद्रमा पवित्र स्नान गरी आफ्ना पितृहरूका लागि तर्पण तथा तिथि अर्पण गरेका छन्।
रामेश्वरम हिन्दु धर्मका प्रमुख तीर्थस्थलहरूमध्ये एक हो। यहाँ आडी अमावस्या, थाई अमावस्या तथा महालय अमावस्याका दिन अग्नि तीर्थ समुद्रमा पवित्र स्नान गरी पितृहरूका लागि तर्पण र तिथि अर्पण गर्ने परम्परा रहेको छ। आज थाई अमावस्याको अवसरमा तमिलनाडुका विभिन्न जिल्लाहरू तथा अन्य राज्यहरूबाट मध्यरातदेखि नै हजारौँ सवारीसाधन र सरकारी बसमार्फत ठूलो संख्यामा श्रद्धालुहरू रामेश्वरम पुगेका थिए।
थाई अमावस्याको दिन रामनाथस्वामी मन्दिरका कपाट बिहान ४ बजी खोलिएसँगै पूजा–अर्चनाको क्रम शुरु भएको थियो। बिहानदेखि श्रद्धालुहरूले अग्नि तीर्थ समुद्रमा पवित्र स्नान गर्न थाले। त्यसपछि समुद्र तट तथा वरपरका बालुवायुक्त क्षेत्रमा बसेर पितृहरूका लागि तर्पण तथा तिथि अर्पण गरे। यस पश्चात पुनः अग्नि तीर्थमा स्नान गरी रामनाथस्वामी मन्दिरका २२ तीर्थ कुण्डहरूमा पवित्र स्नान गरेर रामनाथस्वामी तथा पार्वतवर्धिनी अम्मालका दर्शन गरे। यो क्रम साँझ ढिलासम्म चल्ने बताइएको छ।
थाई अमावस्याको अवसरमा रामेश्वरममा ठूलो भीड हुने सम्भावनालाई मध्यनजर गर्दै स्थानीय प्रशासनले श्रद्धालुहरूको सुविधा तथा कानून–व्यवस्था कायम राख्न व्यापक प्रबन्ध गरेको छ। सम्पूर्ण क्षेत्रमा ठूलो संख्यामा पुलिस बल तैनाथ गरिएको छ।
---------------
हिन्दुस्थान समाचार / भवानी थामी
