नयाँ दिल्ली, १९ जनवरी (हि.स.)। प्रधानमन्त्री नरेन्द्र मोदी र केन्द्रिय गृह तथा सहकारिता मन्त्री अमित शाहले राष्ट्रिय आपदा मोचन बल (एनडीआरएफ) को स्थापना दिवसका अवसरमा बलका साहसी कर्मीहरूको साहस, समर्पण र निःस्वार्थ सेवाप्रति नमन व्यक्त गरेका छन्। प्रधानमन्त्रीले आपदाका बेला जीवनरक्षा, राहत र पुनर्स्थापनामा एनडीआरएफको भूमिकालाई देश तथा विश्वका लागि उदाहरणीय बताउँदै यसलाई आपदा व्यवस्थापनको वैश्विक मापदण्डको रूपमा उल्लेख गरेका छन्। गृहमन्त्री अमित शाहले एनडीआरएफलाई आपदाका समयमा राष्ट्रको भरपर्दो आधारस्तम्भको संज्ञा दिँदै शहीद जवानहरूलाई श्रद्धाञ्जली अर्पण गरेका छन्।

प्रधानमन्त्री नरेन्द्र मोदीले सामाजिक सञ्जाल प्लेटफर्म ‘एक्स’ मा लेख्दै भने, आपदाका प्रत्येक कठिन क्षणमा एनडीआरएफका जवानहरू अग्रपंक्तिमा रहेर जनताको ज्यान जोगाउने, राहत पुर्‍याउने र आशा पुनःस्थापित गर्ने कार्यमा समर्पित रहन्छन्। उनले जवानहरूको व्यावसायिक दक्षता र कर्तव्यनिष्ठाले सेवाका सर्वोच्च मापदण्डलाई प्रतिबिम्बित गर्ने बताए। प्रधानमन्त्रीका अनुसार, वर्षौँको यात्रामा एनडीआरएफले आपदा तयारी र प्रतिकार्य क्षेत्रमा एउटा बेन्चमार्क स्थापना गरेको छ, जसलाई अन्तरराष्ट्रिय स्तरमा पनि सम्मान प्राप्त भएको छ।

केन्द्रिय गृह तथा सहकारिता मन्त्री अमित शाहले पनि ‘एक्स’ मार्फत एनडीआरएफका कर्मीहरूलाई स्थापना दिवसको शुभकामना व्यक्त गरेका छन्। उनले आपदा–प्रतिरोधी भारत निर्माण गर्ने मोदी सरकारको संकल्प साकार पार्न एनडीआरएफको भूमिका अत्यन्त महत्वपूर्ण रहेको बताए। आज एनडीआरएफ आपदाका बेला देशको विश्वासको मजबुत स्तम्भका रूपमा स्थापित भइसकेको छ। गृहमन्त्रीले अरूको सुरक्षाका लागि आफ्ना प्राण अर्पण गर्ने शहीद जवानहरूलाई श्रद्धासुमन अर्पण गरेका छन्।

उल्लेखनीय छ, राष्ट्रिय आपदा मोचन बल (एनडीआरएफ) को गठन सन् २००६ मा आपदा व्यवस्थापन ऐन, २००५ अन्तर्गत गरिएको हो। यसको उद्देश्य प्राकृतिक तथा मानव–निर्मित आपदाका समयमा छिटो, समन्वित र पेशागत राहत तथा उद्धार कार्य सुनिश्चित गर्नु हो। एनडीआरएफका विशेष रूपमा प्रशिक्षित टोलीहरू भूकम्प, बाढी, चक्रवात, पैह्रो, औद्योगिक दुर्घटना तथा रासायनिक–जैविक आपदाका अवस्थामा परिचालन गरिन्छ।

---------------

हिन्दुस्थान समाचार / भवानी थामी