मेलबर्न, 02 जनवरी (हि.स.)। सात पटककी ग्रान्ड स्ल्याम एकल च्याम्पियन वीनस विलियम्सलाई १८ जनवरीदेखि मेलबर्नमा शुरु हुने अष्ट्रेलियन ओपन २०२६ टेनिस प्रतियोगिताका लागि वाइल्ड कार्ड प्रवेश प्रदान गरिएको छ। प्रतियोगिता आयोजकहरूले शुक्रबार यसको आधिकारिक पुष्टि गरेका हुन्।
४५ वर्षीया वीनस विलियम्स लगभग २८ वर्षपछि मेलबर्न पार्कमा पुनरागमन गर्दैछिन्। उनले यहाँ पहिलो पटक सन् १९९८ मा खेल्दै दोस्रो चरणमा आफ्नी कान्छी बहिनी सेरेना विलियम्सलाई पराजित गरेकी थिइन्। तर, क्वार्टरफाइनलमा भने उनी अमेरिकी खेलाडी लिन्डसे डेभनपोर्टसँग पराजित भएकी थिइन्।
वीनसले नोभेम्बरमा अष्ट्रेलियन ओपन शुरु हुनुभन्दा दुई हप्ता अगाडि न्युजिल्यान्डको अकल्यान्डमा हुने प्रतियोगितामा सहभागी हुने घोषणा गरेकी थिइन्, जहाँ उनलाई पनि वाइल्ड कार्ड प्रदान गरिएको छ। यसका अतिरिक्त, अष्ट्रेलियन ओपन शुरु हुनु अघि उनी अष्ट्रेलियाको होबार्टमा आयोजना हुने अर्को प्रतियोगितामा पनि सहभागिता जनाउनेछिन्।
वीनस विलियम्स अन्तिम पटक सन् २०२१ मा मेलबर्नमा देखिएकी थिइन्। उनी अष्ट्रेलियन ओपन महिला एकलमा दुई पटक उपविजेता भइसकेकी छन्—सन् २००३ र २०१७ मा, जहाँ दुवै पटक फाइनलमा उनलाई बहिनी सेरेनाबाट पराजित भएकी थिइन्।
वीनसले भनिन्, “म अष्ट्रेलिया फर्किन पाउँदा अत्यन्तै उत्साहित छु र अष्ट्रेलियन समरको समयमा प्रतिस्पर्धा गर्न आतुर छु। यहाँसँग मेरा धेरै राम्रा सम्झनाहरू जोडिएका छन्, र त्यही स्थानमा फेरि फर्कने अवसर पाउनु मेरो करियरका लागि निकै अर्थपूर्ण छ।”
मेलबर्न पार्कमा वीनसको कीर्तिमान ५४ जित र २१ हारको रहेको छ। सन् २०२६ मा उनी २२औँ पटक अष्ट्रेलियन ओपनको मुख्य ड्रमा सहभागी हुँदैछिन्।
प्रतियोगिता आयोजकहरूका अनुसार, वीनस विलियम्स अष्ट्रेलियन ओपनको मुख्य ड्रमा खेल्ने सबैभन्दा धेरै उमेरकी महिला खेलाडी बन्नेछिन्। यसअघि यो कीर्तिमान जापानकी किमिको डेटेको नाममा थियो, जसले सन् २०१५ मा ४४ वर्षको उमेरमा यहाँ प्रतिस्पर्धा गरेकी थिइन्।
हिन्दुस्थान समाचार / भवानी थामी
