नयाँ दिल्ली, 0१ अक्टोबर (हि.स.)। प्रधानमन्त्री नरेन्द्र मोदी, लोकसभा अध्यक्ष ओम बिरला र रक्षामन्त्री राजनाथ सिंहलगायत धेरै नेताले बिहिबार पूर्वराष्ट्रपति रामनाथ कोविन्दलाई जन्मदिनको हार्दिक शुभकामना दिएका छन्।

प्रधानमन्त्री मोदीले ‘एक्स’ मा लेखेका छन्, “पूर्वराष्ट्रपति रामनाथ कोविन्दलाई जन्मदिनको हार्दिक शुभकामना! सार्वजनिक जीवनमा उहाँको लामो कार्यकालका क्रममा भारतको विकास, हाम्रो संविधानमा निहित मूल्य तथा जनकल्याणप्रति उहाँको अटुट प्रतिबद्धता रह्यो। उहाँले पूर्ण उत्साह र सरलताका साथ देशको सेवा गर्नुभएको छ, जसका कारण समाजका सबै वर्गका मानिसले उहाँलाई सम्मान गर्छन्। ईश्वरले उहाँलाई उत्तम स्वास्थ्य, सुख-समृद्धि तथा दीर्घायु प्रदान गरून्।”

बिरलाले भनेका छन्, 'सार्वजनिक जीवनमा सरलता, संवैधानिक मूल्यप्रतिको प्रतिबद्धता, कर्तव्यनिष्ठा तथा सामाजिक सरोकारका कारण विशिष्ट पहिचान बनाउनुभएका रामनाथ कोविन्दको जीवन निरन्तर सेवा र समर्पणको मार्ग देखाउने खालको छ।' उनले ईश्वरसँग कोविन्दलाई दीर्घायु, उत्तम स्वास्थ्य, सुख-शान्ति तथा निरन्तर सक्रिय जीवन प्रदान गरून् भनेर प्रार्थना गरेका छन्।

राजनाथ सिंहले समाज र राष्ट्रको सेवामा कोविन्दको लामो योगदान रहेको बताएका छन्। विभिन्न विषयमा उनको अध्ययन तथा विचारले सबैलाई प्रभावित पार्ने उल्लेख गर्दै सिंहले सार्वजनिक जीवनमा उनको अनुभव र सरलता विशेष रूपमा प्रशंसनीय रहेको बताएका छन्।

केन्द्रिय गृहमन्त्री तथा सहकारितामन्त्री अमित शाहले सामान्य परिवारबाट आएर देशको सर्वोच्च पदसम्म पुगेका कोविन्दको यात्रा तथा वञ्चित वर्गको कल्याण र संवैधानिक दायित्वप्रतिको उनको समर्पण प्रेरणादायी रहेको बताएका छन्। उनले कोविन्दको स्वस्थ तथा दीर्घ जीवनको कामना गरेका छन्।

केन्द्रिय सडक परिवहन तथा राजमार्गमन्त्री नितिन गडकरीले रामनाथ कोविन्दको उत्तम स्वास्थ्य, दीर्घायु तथा मंगलमय जीवनका लागि ईश्वरसँग प्रार्थना गरेका छन्।

केन्द्रिय कृषि तथा किसान कल्याणमन्त्री शिवराज सिंह चौहानले जनसेवा तथा राष्ट्रहितप्रति रामनाथ कोविन्दको समर्पण सबैका लागि प्रेरणाको स्रोत रहेको बताएका छन्।

केन्द्रिय कपडामन्त्री गिरिराज सिंहले पनि रामनाथ कोविन्दको राम्रो स्वास्थ्यका लागि ईश्वरसँग प्रार्थना गरेका छन्।

भारतीय जनता पार्टीका राष्ट्रिय अध्यक्ष नितिन नवीनले सार्वजनिक जीवनमा रामनाथ कोविन्दको योगदान तथा जनसेवाप्रतिको उनको समर्पण सबैका लागि प्रेरणाको स्रोत रहेको बताएका छन्।

हिन्दुस्थान समाचार / भवानी थामी