आइची-नागोया, 0१ अक्टोबर (हि.स.)। भारतीय धनुर्धर चिकिता तनीपार्थी एसियाली खेलकुद २०२६ को महिला कम्पाउन्ड व्यक्तिगत स्पर्धाको क्वार्टरफाइनलमा इन्डोनेसियाकी नुरिसा दियान अशरीफासँग १४३-१४४ अंकले पराजित भएकी छन्। यस हारसँगै चिकिताको व्यक्तिगत स्पर्धाको यात्रा समाप्त भएको छ।

बुधबार भारतीय कम्पाउन्ड टोलीको स्वर्णिम अभियानमा दुई स्वर्ण पदक जितेकी चिकिता बिहिबार पनि सेमिफाइनलमा पुग्ने बलियो स्थितिमा थिइन्। तर अन्तिम चरणमा उनको एउटा आठ अंकको प्रहार निर्णायक बन्यो। नुरिसाले दबाउबीच संयम कायम राख्दै १४४ अंक जोडेर अन्तिम चारमा स्थान बनाइन्।

चिकिता यसअघि महिला व्यक्तिगत कम्पाउन्डमा भारतका लागि स्वर्ण पदक जितेकी ज्योति सुरेखा वेन्नमको उपलब्धिलाई निरन्तरता दिँदै अर्को स्वर्ण जित्ने प्रयासमा थिइन्। तर उनको पराजयसँगै यस स्पर्धामा भारतको पदक सम्भावना समाप्त भएको छ।

चिकिताले बुधबार भारतको ऐतिहासिक प्रदर्शनमा महत्वपूर्ण भूमिका निर्वाह गरेकी थिइन्। उनले महिला कम्पाउन्ड टोली तथा कम्पाउन्ड मिश्रित टोली स्पर्धामा स्वर्ण पदक जितेकी थिइन्। मिश्रित टोलीमा साहिल जाधवसँग मिलेर हासिल गरेको जितले भारतलाई लस एन्जलस २०२८ ओलम्पिकका लागि कोटा पनि दिलाएको थियो।

हिन्दुस्थान समाचार / बिशाल