चेन्नई, १० अक्टोबर (हि.स.)। लोकसभामा विपक्षका नेता राहुल गान्धीले शनिवार तमिलनाडुका मुख्यमन्त्री एवं तमिलगा वेत्री कझगम (टीवीके) का अध्यक्ष जोसेफ विजयसँग चेन्नई नजिकै पनैयुर स्थित उनको निवासमा भेट गरेका छन्। मुख्यमन्त्री विजयले पुष्पगुच्छा प्रदान गरेर राहुल गान्धीको स्वागत गरे। यस क्रममा राहुल गान्धीले मदुरान्तकम र धारापुरम विधानसभा क्षेत्रमा टीवीकेले हासिल गरेको जितका लागि विजयलाई बधाई दिए। त्यसपछि दुवै नेताले दिउँसोको भोजनका क्रममा कुराकानी गरे।

राहुल गान्धी र मुख्यमन्त्री विजयबीच भएको यस भेटमा टीवीके, कांग्रेस वा गठबन्धनमा सहभागी अन्य कुनै पनि दलका नेता उपस्थित थिएनन्। बैठकमा कुन-कुन विषयमा छलफल भयो भन्नेबारे आधिकारिक जानकारी सार्वजनिक भएको छैन।

यद्यपि, तमिलगा वेत्री कझगमको नेतृत्वमा धर्मनिरपेक्ष सामाजिक न्याय विजय गठबन्धन गठन भएपछि दुवै नेताबीच भएको यस भेटलाई गठबन्धनको अवस्थासँग जोड़ेर हेरिएको छ। तर, छलफलको कार्यसूचीबारे अहिलेसम्म कुनै आधिकारिक पुष्टि भएको छैन।

यसैबीच, दिल्लीमा कांग्रेसका कार्यकर्ताहरू विशेष गहन पुनरावलोकन (एसआईआर) प्रक्रिया विरुद्ध प्रदर्शन गरिरहेका छन्।

राहुल गान्धीले ‘छात्रों की गूँज’ कार्यक्रम मार्फत विद्यार्थीसँग संवाद पनि गरिरहेका छन्। यस पहल अन्तर्गत नीट सहित विभिन्न परीक्षामा प्रश्नपत्र लीक भएको आरोप, शैक्षिक शुल्कमा वृद्धि, शिक्षा प्रणालीमा कथित अनियमितता तथा बेरोजगारी जस्ता समस्याबाट प्रभावित विद्यार्थीका मुद्दाहरूमाथि छलफल भइरहेको छ।

हिन्दुस्थान समाचार / भवानी थामी