नयाँ दिल्ली, ११ अक्टोबर (हि.स.)। भारतीय रेलवेमा सरकारी जागिर खोजिरहेका युवाहरूका लागि रेलवे भर्ती बोर्ड (आरआरबी) ले गैरप्राविधिक लोकप्रिय श्रेणी (एनटीपीसी-स्नातक) अन्तर्गत ३,५४८ पदमा भर्ती प्रक्रिया शुरु गरेको छ। यसका लागि अनलाइन आवेदन प्रक्रिया ८ अक्टोबरदेखि शुरु भएको छ र ६ नोभेम्बर २०२६ सम्म आवेदन दिन सकिनेछ।

रेल्वे मन्त्रालय अनुसार, यस भर्ती अन्तर्गत मालगाडी प्रबन्धकका २,७५०, वरिष्ठ लिपिक तथा सह टाइपिस्टका ३७१, कनिष्ठ लेखा सहायक तथा सह टाइपिस्टका ३०० र मुख्य वाणिज्यिक तथा टिकट पर्यवेक्षकका १२७ पदमा नियुक्ति गरिनेछ। मूल तलबका अतिरिक्त सातौँ केन्द्रिय वेतन आयोग अनुसार भत्ता तथा अन्य सेवा सुविधा उपलब्ध हुनेछन्।

आवेदन शुल्क बुझाउने अन्तिम मिति ८ नोभेम्बर तोकिएको छ। आवेदन फाराममा ९ देखि १८ नोभेम्बरसम्म सुधार वा संशोधन गर्न सकिनेछ। आवेदन दिन मान्यताप्राप्त विश्वविद्यालयबाट स्नातक वा सोसरहको योग्यता हासिल गरेको हुनुपर्नेछ। उम्मेदवारको न्यूनतम उमेर १८ वर्ष र अधिकतम उमेर ३३ वर्ष निर्धारण गरिएको छ। नियमानुसार आरक्षित वर्गका उम्मेदवारलाई अधिकतम उमेर सीमामा छुट दिइनेछ।

उम्मेदवारको छनोट योग्यताका आधारमा विभिन्न चरणमा गरिनेछ। यसमा पहिलो र दोस्रो चरणको कम्प्युटरमा आधारित परीक्षा, कागजात प्रमाणीकरण तथा स्वास्थ्य परीक्षण समावेश छन्। आवश्यकता अनुसार टाइरपिङ परीक्षा र दिव्याङ्ग उम्मेदवारका लागि तोकिएका सुविधाको व्यवस्था पनि गरिनेछ।

विस्तृत सूचना हेर्न तथा अनलाइन आवेदन दिन उम्मेदवारहरूले रेलवे भर्ती बोर्डको आधिकारिक वेबसाइट प्रयोग गर्नुपर्नेछ।

हिन्दुस्थान समाचार / भवानी थामी