जौनपुर, १२ अक्टोबर (हि.स.)। उत्तर प्रदेशको जौनपुर जिल्ला स्थित सुजानगञ्ज थाना क्षेत्रको नारीपुर गाउँमा सोमवार बिहान ५९ वर्षीय ओमप्रकाश मिश्रको शव फेला परेको छ। उनी गाउँका पूर्व प्रधान राजेन्द्र मिश्र उर्फ रज्जनका कान्छा भाइ हुन्। परिवारका सदस्यहरूले आइतवार राति उनको हत्या गरिएको आरोप लगाएका छन्। घटनाको सूचना पाएपछि पुगेको पुलिसले अनुसन्धान शुरु गरेको छ।

सुजानगञ्ज थानाका प्रभारी अमित पाण्डेय अनुसार, गाउँबाट लगभग एक किलोमिटर टाढ़ा ओमप्रकाश मिश्रको शव फेला परेको हो। उनको टाउको र अनुहारमा चोटका निशान देखिएका छन्। कुनै गह्रौँ वस्तुले प्रहार गरी उनको हत्या गरिएको आशङ्का गरिएको छ। यद्यपि, हत्याको कारण र घटनाक्रमबारे पुलिस अनुसन्धानपछि मात्रै पुष्टि हुने उनले बताए।

घटनापछि आक्रोशित परिवारका सदस्य तथा गाउँलेहरूले घटनास्थलमा उच्च अधिकारीहरूलाई बोलाउन माग गर्दै शव उठाउन विरोध गरेका थिए। परिस्थितिलाई ध्यानमा राख्दै सुजानगञ्ज, महराजगञ्ज र बदलापुर थानाका पुलिस घटनास्थलमा परिचालन गरिएको थियो। पुलिसले परिवारका सदस्य तथा गाउँलेहरूलाई सम्झाउने प्रयास गरेको थियो।

सुजानगञ्ज थानाका प्रभारीले घटनाको गम्भीरतापूर्वक अनुसन्धान भइरहेको बताएका छन्। हत्याको कारण पत्ता लगाउनुका साथै घटनासँग सम्बन्धित प्रमाणहरू सङ्कलन गर्ने काम भइरहेको र अनुसन्धानका आधारमा थप कारबाही गरिने पुलिसले जनाएको छ।

हिन्दुस्थान समाचार / भवानी थामी