मस्कट (ओमान)/तेहरान (इरान), १२ अक्टोबर (हि.स.)। ब्रिटेनको समुद्री सुरक्षा एजेन्सी युनाइटेड किङ्डम मेरिटाइम ट्रेड अपरेसन्स (यूकेएमटीओ) ले ओमानको सोहारनजिक कच्चा तेल बोकेको ट्याङ्करमाथि ड्रोन हमला भएको पुष्टि गरेको छ। उक्त हमलापछि दुई भारतीय नाविक बेपत्ता भएका छन्।

गल्फ न्युजको रिपोर्टअनुसार, यूकेएमटीओले आफ्नो पछिल्लो सूचनामा सोहारको समुद्री एंकरेजनजिक ट्याङ्करमाथि मानवरहित हवाई यान (ड्रोन) बाट हमला भएको जनाएको छ। स्थानीय अधिकारीहरूले चालकदलका सदस्यहरूलाई सुरक्षित रूपमा बाहिर निकालेका छन्। यद्यपि, हमलाबाट पर्यावरणमा परेको असरबारे तत्काल कुनै जानकारी प्राप्त भएको छैन।

अमेरिकाले इरानका केही सर्त स्वीकार गरेको दाबी

यसैबीच, इरानी अधिकारी मोहसेन रेजाईले आइतबार सामाजिक सञ्जाल एक्समार्फत अमेरिका द्वन्द्व अन्त्य गर्न तेहरानले अघि सारेका सात सर्तमध्ये केही स्वीकार गर्न सहमत भएको दाबी गरेका छन्। इरानको सर्वोच्च राष्ट्रिय सुरक्षा परिषद्का सचिव रेजाईले भनेका छन्, “अमेरिका इरानका सात सर्तमध्ये केहीमा सहमत भएको छ, तर हामी उसको जवाफलाई अपर्याप्त मान्छौँ।”

रेजाईले वासिङ्टनमाथि होर्मुज जलडमरूमध्य पुनः खोल्न नसकेको र ‘तस्करी’ को सहारा लिएको आरोपसमेत लगाएका छन्। उनले लेखेका छन्, “अमेरिकी नौसैनिक बेडा होर्मुज पुनः खोल्न असफल भएपछि उसले तस्करीको सहारा लिएको छ। अमेरिकी सेना यसअघि कहिल्यै यति लज्जास्पद अवस्थामा पुगेको थिएन।”

इरानले अमेरिकाले आफ्ना मागहरू स्वीकार गरेमा सात दिनभित्र समुद्री यातायात सामान्य अवस्थामा फर्काउने प्रस्ताव राखेको छ। अमेरिकाले कतारका मध्यस्थकर्ताहरूमार्फत यसको जवाफ दिएको बताइएको छ।

हिन्दुस्थान समाचार / बिशाल