नोएडा, १२ अक्टोबर (हि.स.)। बिसरख थाना पुलिसले आइतवार राति प्राप्त सूचनाका आधारमा तीन जना साइबर ठगलाई पक्राउ गरेको छ।

बिसरख थानाका प्रभारी निरीक्षक रञ्जित कुमार सिंह अनुसार, पक्रा पर्नेहरूमा कुणाल, आतिश र प्रेम रहेका छन्। उनीहरूका अन्य दुई साथी अरुण कुमार र नावेद भने घटनास्थलबाट फरार भएका छन्।

पुलिसले पक्रा परेकाहरूदेखि विभिन्न ब्याङ्कका २९ वटा पासबुक, २३ वटा चेकबुक, दुई वटा डेबिट कार्ड, १४ वटा आधार कार्ड, आठ वटा प्यान कार्ड तथा घटनामा प्रयोग गरिएका तीन वटा मोबाइल फोन जफत गरेको छ।

पुलिस अनुसार, पक्रा पर्नेहरूले सर्वसाधारणलाई विभिन्न प्रकारका लाभ उपलब्ध गराइदिने प्रलोभन देखाएर साइबर ठगी गर्ने गरेको प्रारम्भिक सोधपुछका क्रममा बताएका छन्। उनीहरूले विभिन्न व्यक्तिका आधार कार्ड प्राप्त गरी त्यसका आधारमा ब्याङ्कमा नक्कली खाता खोल्ने र साइबर ठगीबाट प्राप्त रकम ती खातामा जम्मा गराउने गरेको पनि खुलेको छ।

पक्रा परेकाहरूले सयौँ व्यक्तिसँग ठगी गरेको स्वीकार गरेको पुलिसले जनाएको छ। घटनामा संलग्न फरार व्यक्तिहरू तथा उनीहरूका अन्य सहयोगीको खोजी भइरहेको छ।

हिन्दुस्थान समाचार / भवानी थामी