काठमाडौँ, १४ अक्टोबर (हि.स.)। नेपालको सत्तारूढ राष्ट्रिय स्वतन्त्र पार्टी (रास्वपा) का सांसद खगेन्द्र सुनार फेरि विवादमा परेका छन्। एक महिलाको सम्मानमा चोट पुर्‍याउने र उनलाई ज्यान मार्ने धम्की दिएको भनिएको अडियो सार्वजनिक भएपछि उनीविरुद्ध जाँच शुरु गरिएको छ।

बाँकेबाट निर्वाचित सङ्घीय सांसद खगेन्द्र सुनारले कथित रूपमा आपराधिक कसुरको श्रेणीमा पर्ने धम्की दिएको विषयमा रास्वपाले आन्तरिक जाँच शुरु गरेको छ। यसका साथै पार्टीले सांसद सुनारलाई कुनै पनि सार्वजनिक कार्यक्रममा सहभागी हुन प्रतिबन्ध लगाएको छ। यद्यपि, यस विषयमा सरकारले अहिलेसम्म कुनै प्रतिक्रिया दिएको छैन।

पार्टीका महामन्त्री विपिनकुमार आचार्यले बुधबार बिहान जारी गरेको विज्ञप्तिमा सार्वजनिक भएका यी घटनाको गम्भीरतालाई ध्यानमा राख्दै राज्यका सम्बन्धित निकायहरूले तत्काल स्वतन्त्र, निष्पक्ष र तथ्यपरक अनुसन्धान गर्ने विश्वास व्यक्त गरेका छन्। उनले यस विषयमा सरकारमा सहभागी पदाधिकारीहरूसँग अनौपचारिक रूपमा छलफल भइरहेको पनि बताएका छन्।

एक स्थानीय सञ्चारमाध्यमले उक्त अडियो सार्वजनिक गरेको थियो। त्यसमा कथित रूपमा एक महिलालाई अपशब्द प्रयोग गर्दै समयमै पैसा नदिए ज्यानसमेत मार्ने धम्की दिइएको सुनिन्छ।

सुनार सत्तारूढ राष्ट्रिय स्वतन्त्र पार्टीका केन्द्रिय सदस्यसमेत हुन्।