म्यानचेस्टर, 16 अक्टोबर (हि.स.)। म्यानचेस्टर युनाइटेडका डिफेन्डर लिसान्द्रो मार्टिनेजले च्याम्पियन्स लिगमा एट्लेटिको म्याड्रिडसँग पराजित भएपछि क्लबका उच्च अधिकारीहरूको आलोचना गरेकोमा बिहीबार माफी मागेका छन्। उनले मुख्य प्रशिक्षक माइकल क्यारिक र क्लबका वरिष्ठ अधिकारीहरूसँग भेटवार्ता गरेपछि माफी मागेका हुन्। मङ्गलबार एट्लेटिकोसँग ०-२ गोलले पराजित भएपछि मार्टिनेजले उच्चस्तरमा प्रतिस्पर्धा गर्न क्लबले थप लगानी गर्नुपर्ने बताएका थिए।

प्रशिक्षणपछि भएको भेटवार्तालाई सकारात्मक बताउँदै अर्जेन्टिनाका अन्तर्राष्ट्रिय खेलाडी मार्टिनेजले सामाजिक सञ्जाल इन्स्टाग्राममार्फत हारपछि आफूले निराशाका कारण अनुपयुक्त समयमा आफ्ना भावना व्यक्त गरेको स्वीकार गरेका छन्। उनले भने, “हारको निराशाले गर्दा मैले आफ्ना भावना व्यक्त गर्न उपयुक्त समय र स्थान रोज्न सकिनँ। यसका लागि माफी माग्न चाहन्छु।”

यसअघि उनले क्लबका फुटबल निर्देशक जेसन विल्कक्सको उल्लेख गर्दै प्रतिद्वन्द्वी टोलीहरूको स्तरमा पुग्न, नयाँ खेलाडी अनुबन्ध गर्न र युरोपेली प्रतियोगितामा प्रतिस्पर्धा गर्न सक्षम टोली निर्माण गर्न थप लगानी आवश्यक रहेको बताएका थिए।

मार्टिनेजले आफ्ना टिप्पणीले क्लबभित्र आवश्यक एकताको भावना प्रतिबिम्बित नगरेको स्वीकार गरेका छन्। उनले क्लबका सबै सदस्य साझा लक्ष्य हासिल गर्न र समर्थकलाई अपेक्षित सफलता दिलाउन प्रयासरत रहेको बताए।

उनले भने, “हाम्रो क्लब सबै एकजुट हुँदा उत्कृष्ट अवस्थामा हुन्छ। अब यो विषयलाई पछाडि छाडेर हाम्रो सम्पूर्ण ध्यान मिलेर जित हासिल गर्नमा केन्द्रित हुनेछ।”

यस सत्रमा म्यानचेस्टर युनाइटेडको प्रदर्शन निराशाजनक रहेको छ। छ खेलपछि टोली प्रिमियर लिगको अङ्कतालिकामा १३औँ स्थानमा रहेको छ। क्लबका लागि यो पछिल्लो ४० वर्षकै खराब शुरुआत भएको बताइएको छ।

युनाइटेडले आइतबार आफ्नो घरेलु मैदानमा खेल्ने लिड्स युनाइटेडसँगको प्रतिस्पर्धामा राम्रो प्रदर्शन गर्ने लक्ष्य राखेको छ।

हिन्दुस्थान समाचार / बिशाल