कोटा, १७ अक्टोबर (हि.स.)। राजस्थानको कोटा जिल्लामा दिल्ली-मुम्बई एक्सप्रेस-वेमा शनिबार बिहान भएको सडक दुर्घटनामा आठ जनाको मृत्यु भएको छ भने अन्य धेरै घाइते भएका छन्। २५ जनाभन्दा बढी यात्रु सवार एउटा मिनी बस (टेम्पो ट्राभलर) अनियन्त्रित भएर लगभग १५ फिट तल नालामा खस्यो। दुर्घटनापछि बसभित्र चिच्याहट र कोलाहल मच्चियो। सिटहरूका बीचमा फसेका यात्रुहरूलाई बाहिर निकाल्न छेउछाउका गाउँलेहरूले निकै मेहनत गर्नुपरेको थियो। जिल्ला कलेक्टर पीयूष सामरियाले दुर्घटनामा आठ जनाको मृत्यु भएको जानकारी दिएका छन्। घाइतेहरूलाई जिल्ला मुख्यालय ल्याइएको छ।

पुलिसका अनुसार, शनिबार बिहान करिब ६ बजी सिमलिया थाना क्षेत्रअन्तर्गत कराडिया टोलबाट केही किलोमिटर टाढा दुर्घटना भएको हो। टेम्पो ट्राभलर मध्य प्रदेशको राजधानी भोपालबाट खाटूश्यामको दर्शन गर्न जाँदै थियो। त्यसमा २५ जनाभन्दा बढी यात्रु सवार थिए। तीमध्ये धेरैजना मध्य प्रदेशको बैतूल जिल्लाका बासिन्दा रहेको बताइएको छ। अचानक बस पुलबाट तल नालामा खस्यो। ठक्कर यति भीषण थियो कि बसको अगाडिको भाग नराम्ररी क्षतिग्रस्त भयो र अगाडिका सिटमा बसेका यात्रुहरू गम्भीर रूपमा घाइते भए।

दुर्घटनापछि घटनास्थलमा पुगेका गाउँलेहरूले उद्धार तथा राहत कार्य शुरु गरे। बसमा फसेका यात्रुहरूलाई बाहिर निकाल्न झ्यालका सिसाहरू फुटाइयो। धेरै यात्रु सिटहरूका बीचमा फसेका थिए, जसलाई बाहिर निकाल्न निकै समय लागेको थियो।

सूचना पाएपछि पुलिस र उद्धार टोली पनि घटनास्थलमा पुगे। घाइतेहरूलाई उपचारका लागि अस्पताल पुर्याइयो।

कोटा मेडिकल कलेजका प्राचार्य डा. नीलेश जैनका अनुसार, दुर्घटनामा मृत्यु भएका र घाइते भएकाहरूको पहिचान गरिएको छ। मृतकहरूमा अरुणा, वैष्णवी, त्रिशा, कृष्णा, अनिता, ओम सूर्यवंशी र राजूको नाम सार्वजनिक भएको छ। बस चालकको पनि मृत्यु भएको छ। यसरी दुर्घटनामा कुल आठ जनाले ज्यान गुमाएका छन्।

घाइतेहरूमा वन्दिता, अजय गावण्डे, वेदान्त झरबडे, मोहनिस झरबडे, आकांक्षी झरबडे, हेमलता गायकवाड र सारांशसहित अन्य यात्रुहरू रहेको बताइएको छ। घाइतेहरूको अस्पतालमा उपचार भइरहेको छ।

पुलिस अधिकारीहरूले प्रारम्भिक रूपमा चालकलाई निद्रा लागेका कारण बस अनियन्त्रित भएर पुलबाट तल खसेको हुन सक्ने आशङ्का गरेका छन्। यद्यपि, दुर्घटनाको वास्तविक कारणबारे अनुसन्धान पूरा भएपछि मात्र पुष्टि हुन सक्नेछ।

हिन्दुस्थान समाचार / भवानी थामी