काठमाडौँ, १८ अक्टोबर (हि.स.)। नेपालका हिमाली जिल्लाहरूमा न्यूनतम तापक्रम शून्यभन्दा तल झरेको छ। तापक्रममा लगातार गिरावट आएसँगै चिसो बढेको छ।
मौसम पूर्वानुमान महाशाखाका प्रवक्ताले आइतबार बिहान १७ हिमाली जिल्लाको तापक्रमसम्बन्धी तथ्याङ्कअनुसार हुम्ला, जुम्ला, रोल्पा, डोल्पा, मनाङ, मुस्ताङलगायत करिब एक दर्जन जिल्लाका उत्तरी क्षेत्रमा सबैभन्दा कम न्यूनतम तापक्रम माइनस ०.५ डिग्री सेल्सियस मापन गरिएको जानकारी दिएका छन्। यी क्षेत्रमा गत शनिबार न्यूनतम तापक्रम १.५ डिग्री र शुक्रबार ३.० डिग्री सेल्सियस थियो।
त्यसैगरी सङ्खुवासभा, रसुवा, बाजुरा, मुगु र कालिकोटजस्ता उत्तरी सीमावर्ती जिल्लाहरूको तापक्रम शून्य डिग्रीको आसपास पुगेको छ। तापक्रम शून्य डिग्रीको आसपास रहेका क्षेत्रमा हिमपात भएको जानकारी दिइएको छ।
महाशाखाका अनुसार, आइतबार बिहान ८:४५ बजी काठमाडौँको न्यूनतम तापक्रम १०.५ डिग्री सेल्सियस मापन गरिएको छ। यसअघि शनिबार १३.८ डिग्री र शुक्रबार १५.० डिग्री सेल्सियस थियो।
आइतबार ओखलढुङ्गामा न्यूनतम तापक्रम ६.२ डिग्री सेल्सियस, डडेलधुरामा ५.९ डिग्री, ताप्लेजुङमा ३.७ डिग्री, वीरेन्द्रनगरमा ४.३ डिग्री, दीपायलमा ५.५ डिग्री, धनकुटामा ५.६ डिग्री, घोराहीमा ७.० डिग्री र पोखरामा ७.५ डिग्री सेल्सियस मापन गरिएको छ।
महाशाखाले हरेक दिन बिहान ८:४५ बजी न्यूनतम तापक्रम र साँझ ५:४५ बजी मापन गरिएको अधिकतम तापक्रमको विवरण आफ्नो वेबसाइटमार्फत सार्वजनिक गर्दै आएको छ। महाशाखाका अनुसार, हाल देशमा पश्चिमी वायुको आंशिक प्रभाव कायम रहेको छ।
हिन्दुस्थान समाचार / बिशाल
