मुम्बई, १९ अक्टोबर (हि.स.)। अभिनेता टाइगर श्रफमाथि भएको गोली प्रहारको घटनालाई लिएर अल इन्डियन सिने वर्कर्स एसोसिएशन (एआईसीडब्ल्यूए) ले कड़ा आक्रोश व्यक्त गरेको छ। सङ्गठनले राज्य सरकारसँग आरोपीहरू विरुद्ध कड़ा कारबाही गर्न र चलचित्र जगतसँग सम्बन्धित व्यक्तिहरूको सुरक्षा सुनिश्चित गर्न माग गरेको छ।

सङ्गठनले यस घटनाप्रति चिन्ता व्यक्त गर्दै महाराष्ट्र सरकार र मुम्बई पुलिसको कार्यशैलीमाथि प्रश्न उठाएको छ। सङ्गठन अनुसार, यस हमलामा टाइगर श्रफको ज्यान समेत जान सक्थ्यो, जबकि उनका चालकलाई गोली लाग्यो।

एआईसीडब्ल्यूएले सामाजिक सञ्जालको माध्यम एक्समा जारी गरेको वक्तव्यमा बलिउडका चर्चित व्यक्तिहरूलाई लगातार निशाना बनाइँदै आएको र यसबाट जानाजानी त्रासको वातावरण सिर्जना गरिँदै आएको बताएको छ। सङ्गठनले सलमान खानको बान्द्रा स्थित निवास बाहिर भएको गोलीबारी, सैफ अली खानमाथि उनको घरभित्र भएको चक्कु प्रहार, रोहित शेट्टीको निवास बाहिर भएको गोलीबारी र कपिल शर्माको क्याफेमा भएका हमलाहरूको पनि उल्लेख गरेको छ। सङ्गठन अनुसार, यी घटनाहरूले कलाकारहरूको सुरक्षालाई लिएर गम्भीर प्रश्न खड़ा गरेका छन्। उसले अपराधीहरूको उद्देश्य चलचित्र क्षेत्रका चर्चित व्यक्तिहरूलाई डर देखाएर उनीहरूबाट पैसा असुल्नु हुनसक्ने आशङ्का व्यक्त गरेको छ।

सङ्गठनले यसअघि भएका घटनाहरूमा ग्याङ्स्टरहरूले जिम्मेवारी लिएको भए पनि यस्ता गिरोहहरू अझै सक्रिय रहेको बताएको छ। केवल वक्तव्य जारी गर्नु पर्याप्त नभएको भन्दै ठोस कारबाही आवश्यक रहेको उसले जनाएको छ। एआईसीडब्ल्यूएले महाराष्ट्रका मुख्यमन्त्री देवेन्द्र फडणवीससँग आरोपीहरूलाई पक्राउ गर्न, ग्याङ्स्टरहरू विरुद्ध कड़ा कदम चाल्न र कलाकारहरूलाई सुरक्षा उपलब्ध गराउन माग गरेको छ।

साथै, मुम्बईमा चलचित्र जगत्का चर्चित व्यक्तिहरू नै सुरक्षित छैनन् भने आम नागरिकको सुरक्षालाई लिएर पनि चिन्ता हुनु स्वाभाविक रहेको सङ्गठनले बताएको छ। यस्ता घटनाहरू रोक्न र कानून व्यवस्थाप्रति जनताको विश्वास पुनः स्थापित गर्न जिम्मेवारी सुनिश्चित गरिनुपर्ने सङ्गठनको भनाइ छ।

हिन्दुस्थान समाचार / भवानी थामी