नयाँ दिल्ली, 0२ अक्टोबर (हि.स.)। भारतीय युवा कांग्रेसले मुख्य निर्वाचन आयुक्त (सीईसी) ज्ञानेश कुमारको राजीनामा माग गर्दै बिहिवार यहाँ प्रदर्शन गरेको छ। प्रदर्शनका क्रममा कार्यकर्ताहरूले निर्वाचन आयोगको निष्पक्षता तथा कार्यप्रणालीमाथि प्रश्न उठाउँदै निर्वाचन आयोगको कार्यालयतर्फ मार्च गर्ने प्रयास गरे। तर दिल्ली पुलिसले अवरोध लगाएर उनीहरूलाई रोक्यो भने कैयौँ कार्यकर्तालाई हिरासतमा लिइयो।
यस अवसरमा उदय भानु चिबले निर्वाचन आयोग देशका सबैभन्दा महत्वपूर्ण लोकतान्त्रिक संस्थामध्ये एक भए पनि यसको निष्पक्षतालाई लिएर जनताको मनमा निरन्तर प्रश्न उठिरहेको बताए। उनले निर्वाचन आयोगको कार्यप्रणालीमाथि प्रश्न उठिरहेको अवस्थामा मुख्य निर्वाचन आयुक्तले अगाड़ी आएर जवाफ दिनुपर्ने र पदमा कायम रहनुको सट्टा राजीनामा दिनुपर्ने बताए।
चिबले निर्वाचन आयोग कुनै सरकार वा राजनीतिक दलको निजी संस्था नभई संविधान र लोकतान्त्रिक व्यवस्थासँग जोड़िएको संस्था भएको बताए। उनले आयोगको विश्वसनीयता र निष्पक्षतासँग सम्बन्धित प्रश्नहरूको जवाफ दिनु मुख्य निर्वाचन आयुक्तको जिम्मेवारी भएको र जवाफदेहिताबाट पन्छिनु लोकतान्त्रिक व्यवस्थाका लागि अनुकूल मान्न नसकिने बताए।
प्रदर्शनका क्रममा युवा कांग्रेसको कार्यालयबाट निर्वाचन आयोगतर्फ मार्च गरिरहेका कार्यकर्ताहरूलाई दिल्ली पुलिसले बाटोमै रोक्यो। त्यसपछि कैयौँ कार्यकर्तालाई हिरासतमा लिइयो।
प्रदर्शनमा दिल्ली युवा कांग्रेसका अध्यक्ष अक्षय लाकड़ा, हरियाणा युवा कांग्रेसका अध्यक्ष निशित कटारिया, राष्ट्रिय महासचिव हरि कृष्णा, खुश्बु शर्मा, मितेन्द्र दर्शन सिंह, राष्ट्रिय सचिव सत्यवान गहलोत, परमिन्दर सिंह पम्मी, हनवरन कंसाना लगायत संगठनका धेरै पदाधिकारी तथा कार्यकर्ताहरू उपस्थित थिए।
/ बिशाल
