काठमाडौँ, २० अक्टोबर (हि.स.)। सर्वसाधारण श्रद्धालुहरूका लागि वर्षमा केवल एक दिन खुल्ने काठमाडौँस्थित तलेजु भवानी मन्दिरमा दर्शन गर्न मंगलबार बिहानैदेखि भक्तजनहरूको लामो ताँती लागेको छ।

विश्व सम्पदा सूचीमा समावेश हनुमानढोका दरबार क्षेत्रमा अवस्थित तलेजु भवानी मन्दिर मंगलबार बिहान ५ बजीदेखि सर्वसाधारण श्रद्धालुहरूका लागि खोलिएको हो। यद्यपि, मन्दिर खुल्नुअघि नै दर्शनार्थीहरूको लामो ताँती लागिसकेको थियो।

हनुमानढोका दरबार व्यवस्थापन कार्यालयकी प्रमुख जयन्ती श्रेष्ठ प्रधानले मन्दिरमा बिहान ५ बजीदेखि साँझ ६ बजीसम्म पूजाआजा तथा दर्शनको व्यवस्था गरिएको जानकारी दिइन्।

यो मन्दिर प्रत्येक वर्ष शारदीय नवरात्रको महानवमीका अवसरमा मात्र सर्वसाधारण श्रद्धालुहरूका लागि खोलिन्छ। यद्यपि, कोरोना महामारीका कारण सन् २०२० मा मन्दिर सर्वसाधारणका लागि खोलिएको थिएन।

आश्विन शुक्ल नवमी अर्थात् महानवमीका दिन मात्र खुल्ने यस मन्दिरमा प्रत्येक वर्ष हजारौँ श्रद्धालुहरूको भीड लाग्ने गर्छ।

नेपाल पञ्चाङ्ग निर्णायक विकास समितिले निर्धारण गरेको शुभ मुहूर्तअनुसार तुलजा भवानीलाई गत शनिबार बिहान ७:३७ बजी हनुमानढोका दरबार क्षेत्रको मूलचोकमा ल्याइएको थियो। सोही दिन बिहान १०:३९ बजी उहाँलाई निर्धारित आसनमा विराजमान गराइएको थियो।

तलेजु भवानीलाई मूलचोकमा विराजमान गराएर महाअष्टमीको रात कालरात्रि पूजा गरिएको थियो। मन्दिर व्यवस्थापनका अनुसार, यस पूजाका क्रममा ५४ वटा बोकाको र ५४ वटा राँगाको बलि दिएर देवीको आराधना पनि गरिएको थियो।

विजयादशमीसम्म तलेजु भवानीलाई मूलचोकमै राखेर पूजाआजा गरिनेछ। बुधबार विजयादशमीका दिन समितिले निर्धारण गरेको शुभ मुहूर्तअनुसार बिहान १०:५१ बजी देवीको यात्रा निकालिनेछ। त्यसपछि बिहान ११:५२ बजी तलेजु भवानीलाई उहाँको मूल मन्दिरमा पुनः निर्धारित आसनमा विराजमान गराइनेछ।

हिन्दुस्थान समाचार / बिशाल