इस्लामाबाद, २१ अक्टोबर (हि.स.)। माल्दिभ्सका राष्ट्रपति डा. मोहम्मद मुइज्जु मङ्गलबार राति पाकिस्तानको राजधानी इस्लामाबाद पुगेका छन्। प्रधानमन्त्री शहबाज शरीफको निमन्त्रणामा उनी तीनदिने राजकीय भ्रमणका लागि पाकिस्तान पुगेका हुन्। राष्ट्रपति मुइज्जुसँग उनकी पत्नी साजिदा मोहम्मद र उच्चस्तरीय प्रतिनिधिमण्डल पनि आएको छ। इस्लामाबाद अन्तरराष्ट्रिय विमानस्थलमा राष्ट्रपति मुइज्जु र उनकी पत्नीको औपचारिक स्वागत गरिएको थियो। यस अवसरमा उनीहरूलाई २१ तोपको सलामीसमेत दिइएको थियो।

‘द न्युज’ को समाचारअनुसार, प्रधानमन्त्री कार्यालयले राष्ट्रपति मुइज्जुको आज प्रधानमन्त्री निवासमा औपचारिक स्वागत गरिने जनाएको छ। राष्ट्रपति मुइज्जु २० देखि २२ अक्टोबरसम्म पाकिस्तानको राजकीय भ्रमणमा रहेका छन्। यस क्रममा उनले पाकिस्तानका राष्ट्रपति आसिफ अली जरदारीसँग भेटवार्ता गर्नेछन्। राष्ट्रपति जरदारीले उनको सम्मानमा राजकीय भोजको आयोजना गर्ने कार्यक्रमसमेत रहेको छ।

पाकिस्तानको विदेश मन्त्रालयका प्रवक्ताले यसअघि दुवै नेताले द्विपक्षीय सम्बन्धका सबै पक्षको समीक्षा गर्ने बताएका थिए। साथै, व्यापार, लगानी, स्वास्थ्य, शिक्षा, पर्यटन, कृषि, रक्षा, समुद्री सुरक्षा, जलवायु परिवर्तन तथा जनस्तरको आदानप्रदानलगायतका क्षेत्रमा सहकार्यलाई थप सुदृढ बनाउने उपायबारे छलफल गरिनेछ।

यसका अतिरिक्त, दुवै नेताले साझा चासोका क्षेत्रीय तथा अन्तरराष्ट्रिय घटनाक्रमबारे पनि विचार आदानप्रदान गर्नेछन्।

वक्तव्यमा भनिएको छ, “यस भ्रमणका क्रममा पाकिस्तान-माल्दिभ्स व्यापार मञ्चको पनि आयोजना गरिनेछ।”

माल्दिभ्सका कुनै राष्ट्रपतिले ११ वर्षपछि पाकिस्तानको राजकीय भ्रमण गरेको यो पहिलो अवसर हो। विदेश मन्त्रालयका प्रवक्ताका अनुसार, यस भ्रमणले द्विपक्षीय साझेदारीलाई थप मजबुत बनाउने र पारस्परिक लाभका लागि सहकार्यका नयाँ अवसर खोल्ने दुवै देशको साझा प्रतिबद्धतालाई प्रतिबिम्बित गर्दछ।

हिन्दुस्थान समाचार / बिशाल