वासिङ्टन (अमेरिका)/तेहरान (इरान), २१ अक्टोबर (हि.स.)। अमेरिकी विदेशमन्त्री मार्को रुबियोले इरानसँग शान्ति सम्झौता गर्नु निकै कठिन रहेको बताएका छन्। उनले तेहरानले होर्मुज जलडमरूमध्यमा व्यावसायिक जहाजलाई निशाना बनाउन बन्द नगरेसम्म इरानमाथि आर्थिक दबाउ कायम रहने स्पष्ट पारेका छन्। यसको जवाफमा इरानका विदेशमन्त्री अब्बास अराघचीले वासिङ्टनले तेहरानका सर्तहरू स्वीकार नगरेसम्म होर्मुज जलडमरूमध्य बन्द रहने बताएका छन्। उनले पाकिस्तान र कतारको माध्यमबाट अप्रत्यक्ष वार्ता जारी रहेको जानकारीसमेत दिएका छन्।

अल जजिरा र सीबीएस न्युजका समाचारअनुसार, रुबियो र अराघचीले आ-आफ्नो देशका सञ्चारमाध्यमसँग कुरा गर्दै यस्तो टिप्पणी गरेका हुन्। यसैबीच, अमेरिकी रक्षामन्त्री पीट हेगसेथको महत्त्वपूर्ण भनाइ सार्वजनिक भएको छ। उनले अमेरिकाले इरानविरुद्ध थप सैन्य कारबाही गर्न तयारी अवस्थामा रहेको बताएका छन्। उनले भने, “हामी इरानसँग कहिल्यै पनि परमाणु हतियार नहोस् भन्ने सुनिश्चित गर्न चाहन्छौँ।”

इरानले आफ्नो संवर्धित युरेनियम देशभित्रै रहने अडान पनि दोहोर्‍याएको छ। उसले करिब ४०० किलोग्राम परमाणु सामग्री रुसको संरक्षणमा राख्ने प्रस्ताव अस्वीकार गरेको छ। पाकिस्तानका सेना प्रमुख आसिम मुनीर अमेरिका र इरानबीच मध्यस्थताको प्रयासलाई अगाडि बढाउन तेहरान भ्रमणमा रहेका बेला यो घोषणा भएको हो।

इरानी अधिकारीहरूले वार्ता पुनः शुरु हुनुअघि वासिङ्टनले विश्वास पुनःस्थापित गर्नुपर्नेमा जोड दिएका छन्। उनीहरूले कूटनीतिक वार्ताका क्रममा अमेरिकाले यसअघि गरेका आक्रमण तथा तेहरानले प्रस्तुत गरेको सातबुँदे प्रस्तावलाई यसको आधारका रूपमा उल्लेख गरेका छन्।

यसैबीच, ह्वाइट हाउसले आगामी ३ नोभेम्बरमा हुने मध्यावधि निर्वाचनअघि अमेरिकाले इरानमाथि आक्रमण गर्ने कुनै योजना नरहेको स्पष्ट पारेको छ।

अराघचीले रुससँग इरानको सम्बन्ध यसअघि कहिल्यै यति घनिष्ठ नरहेको पनि बताएका छन्। यसअघि अमेरिकी राष्ट्रपति डोनाल्ड ट्रम्पले मध्यपूर्वमा जारी युद्धका क्रममा रुसले इरानलाई नगण्य सहयोग गरिरहेको बताएका थिए।

हिन्दुस्थान समाचार / बिशाल