ओस्लो (नर्वे)/वासिङ्टन (अमेरिका), २१ अक्टोबर (हि.स./रिया नोभोस्ती)। युक्रेनका राष्ट्रपति भोलोदिमिर जेलेन्स्कीले युक्रेनमा ४८ घण्टाभित्र स्टारलिङ्क सेवा पुनः सञ्चालन हुने सम्भावना व्यक्त गरे पनि यसबारे अनिश्चितता कायम रहेको छ। अमेरिकी विदेशमन्त्री मार्को रुबियोसँगको कुराकानीपछि जेलेन्स्कीले यस्तो सम्भावना व्यक्त गरेका हुन्। यसैबीच, विश्वका सबैभन्दा धनी व्यक्ति एलन मस्कले युक्रेनमा स्पेसएक्सको उपग्रह सञ्जालमा पहुँच सीमित गर्ने निर्णय गरेको खबर सार्वजनिक भएको छ।

वास्तवमा, १४ अक्टोबरमा युक्रेनका सेरही स्टर्नेन्कोले देशमा स्टारलिङ्क सेवामा प्रतिबन्ध लगाइएको बताएका थिए। मंगलबार ओस्लोमा जेलेन्स्कीले आफूले विदेशमन्त्री रुबियोसँग रेलमा यात्रा गर्ने क्रममा बिहानै कुराकानी गरेको जानकारी दिए। उनले भने, “हामीले इन्टरनेट सम्पर्क, स्टारलिङ्क, अवरोधक उपकरण र गुप्तचर सूचनाजस्ता संवेदनशील विषयमा छलफल गर्‍यौँ। सम्भवतः ४८ घण्टाभित्र हाम्रो सम्पर्क पुनः स्थापित हुनेछ भन्ने सहमति भएको छ।”

स्रोतहरूका अनुसार, उक्त निर्णय गर्नुअघि मस्कले अमेरिकी प्रशासनका अधिकारीहरूसँग पटकपटक कुराकानी गरेका थिए। रुस-युक्रेन युद्धबाट नाफा कमाउने कम्पनीका रूपमा आफ्नो कम्पनीलाई हेरिएकोमा मस्क असन्तुष्ट रहेको बताइएको छ। यद्यपि, सेवा सीमित गर्ने निर्णय कसरी कार्यान्वयन गरियो भन्ने कुरा स्पष्ट भइसकेको छैन।

मस्कले अमेरिकी सरकारलाई स्पेसएक्सको ‘स्टारसिल्ड’ प्रविधिको प्रयोगका लागि अनुमति प्रदान गर्छन्। उनले गत साता अमेरिकाले नै यो प्रविधि कसले प्रयोग गर्न पाउने र प्रयोगकर्ताले कस्तो स्तरको सेवा प्राप्त गर्ने भन्ने निर्णय गर्ने बताएका थिए। मस्कले सामाजिक सञ्जाल एक्समा लेखेका थिए, “गति वा प्रयोगमाथिको कुनै पनि प्रतिबन्ध अमेरिकी सेनाले र अन्ततः अमेरिकी राष्ट्रपतिले निर्धारण गर्छन्।”

यस विषयमा मस्कले टिप्पणीका लागि गरिएको अनुरोधको जवाफ दिएका छैनन्। ह्वाइट हाउस र पेन्टागनसँग पनि प्रतिक्रिया मागिएको छ। मस्कको निर्णयबारे सबैभन्दा पहिले द वाल स्ट्रिट जर्नल ले समाचार प्रकाशित गरेको थियो।

हिन्दुस्थान समाचार / बिशाल