इम्फाल, २६ अक्टोबर (हि.स.)। मणिपुरको इम्फाल पूर्वी जिल्लास्थित बोङ्बल खोलेनको फेदीमा सञ्चालन गरिएको संयुक्त गुप्तचर अभियानका क्रममा सुरक्षा बलले ठूलो मात्रामा हतियार, गोलीगठ्ठा र विस्फोटक पदार्थ बरामद गरेको छ। पुलिसद्वारा अबेर राति जारी आधिकारिक जानकारीअनुसार उक्त अभियान केन्द्रिय रिजर्भ पुलिस बल (सीआरपीएफ) को एमएन सेक्टर द्रुत कारबाही टोली (क्यूएटी), रेञ्ज इम्फाल क्यूएटी तथा इम्फाल पूर्वका कमान्डो टोलीले संयुक्त रूपमा सञ्चालन गरेका थिए।

अभियानका क्रममा एउटा ए-१ राइफल, एउटा .३०३ एलएमजी, म्यागजिनसहित एउटा ९ एमएम पेस्तोल, दुईवटा १२ बोरका दोहोरो नाल भएका बन्दुक, तीनवटा १२ बोरका एकल नाल भएका बन्दुक तथा म्यागजिनसहित स्थानीय रूपमा निर्मित एउटा ९ एमएम पेस्तोल बरामद गरिएको छ।

यसका अतिरिक्त, डेटोनेटर नभएका तीनवटा नम्बर ३६ हाते ग्रेनेड, एउटा चिनियाँ हाते ग्रेनेड, एउटा एमजी-२ राइफल ग्रेनेड, एउटा पोम्पी सेल, चारवटा ताररहित रेडियो सेट र एउटा चार्जर पनि जफत गरिएको छ। सुरक्षा बलले घटनास्थलबाट विभिन्न प्रकारका गोलीगठ्ठाको ठूलो भण्डारसमेत बरामद गरेको छ।

बरामद गरिएका सबै हतियार, गोलीगठ्ठा तथा अन्य सामग्रीलाई थप कानुनी कारबाहीका लागि थौबल ड्याम पुलिस थानामा बुझाइएको छ।

हिन्दुस्थान समाचार / भवानी थामी