गान्तोक, २७ अक्टोबर (हि.स.)। सिक्किम सरकारको कृषि विभागले दिगो कृषि अभ्यासलाई प्रोत्साहन गर्ने तथा किसानहरूलाई कृषि र बागवानीसम्बन्धी विभिन्न सरकारी योजनाबारे सचेत गराउने उद्देश्यले २७ अक्टोबर, २०२६ मा राङ्का ब्लकअन्तर्गत राउते रुम्तेकमा ‘खेत बचाउ अभियान’ कार्यक्रम आयोजना गर्‍यो।

कार्यक्रममा राउते रुम्तेकका पञ्चायत अध्यक्ष सोनाम छिरिङ भोटिया, कृषि विभागका उपनिर्देशक भरत शर्मा, कृषि विज्ञान केन्द्रका वैज्ञानिक बोनिफेस लेप्चा, कृषि निरीक्षक नासरिन थापा, बागवानी निरीक्षक अञ्जना सुब्बा तथा बीटीएम गीता शर्मा उपस्थित थिए।

कार्यक्रमका क्रममा अधिकारीहरूले कृषि तथा बागवानी विभागअन्तर्गत उपलब्ध विभिन्न सरकारी योजना र त्यसबाट प्राप्त हुने सुविधाहरूबारे किसानहरूलाई जानकारी गराए। कृषि उत्पादन बढाउन माटोको स्वास्थ्य र उर्वराशक्ति व्यवस्थापन, माटो संरक्षण तथा उन्नत कृषि प्रविधि अपनाउनुको महत्त्वमाथि विशेष जोड दिइयो।

किसानहरूलाई आफ्नो खेतको माटोमा रहेका पोषक तत्त्वहरूको अवस्था बुझ्न तथा सोहीअनुसार मलको प्रयोगसम्बन्धी उचित निर्णय लिन सहयोग पुर्‍याउने उद्देश्यले माटो स्वास्थ्य कार्ड वितरण गरियो। यसका साथै किसानहरूलाई तोरीखेती गर्न प्रोत्साहित गर्ने उद्देश्यले तोरीको बीउसमेत वितरण गरियो।

कार्यक्रममा ३२ जना पुरुष र २० जना महिला गरी कुल ५२ जना किसानले सक्रिय सहभागिता जनाएका थिए। यस पहलको उद्देश्य किसानहरूमा कृषि तथा बागवानीसम्बन्धी योजनाबारे सचेतना अभिवृद्धि गर्नु, दिगो खेती प्रणालीलाई प्रोत्साहन गर्नु तथा कृषि उत्पादन र स्थानीय किसानहरूको जीविकोपार्जनका अवसरमा सुधार ल्याउनु रहेको कृषि विभागले जनाएको छ।

हिन्दुस्थान समाचार / बिशाल