गान्तोक, २७ अक्टोबर (हि.स.)। सिक्किम विधानसभाका अध्यक्ष मिङ्मा नर्बु शेर्पा २६ अक्टोबर, २०२६ मा नयाँ दिल्लीस्थित संसद भवनको संविधान सदनमा आयोजित १२औँ ब्रिक्स संसदीय मञ्चमा सहभागिता जनाए।

कार्यक्रमको उद्घाटन लोकसभाका अध्यक्ष ओम बिरलाले गरेका थिए। १२औँ ब्रिक्स संसदीय मञ्चमा ब्रिक्सका ११ सदस्य राष्ट्र तथा १० साझेदार राष्ट्रका पीठासीन अधिकारीहरू, विधानसभा अध्यक्षहरू र संसदीय प्रतिनिधिमण्डलहरूको सहभागिता रहेको थियो।

यस अवसरमा प्रधानमन्त्री नरेन्द्र मोदीले पनि ब्रिक्स राष्ट्रहरूका संसदीय प्रतिनिधिमण्डलसँग अन्तरक्रिया गरेका थिए। कार्यक्रममा लोकसभाका अध्यक्ष ओम बिरला र राज्यसभाका उपसभापति हरिवंशले उद्घाटन मन्तव्य दिएका थिए। लोकसभाका महासचिव उत्पल कुमार सिंहले स्वागत मन्तव्य प्रस्तुत गरेका थिए।

‘जनकेन्द्रित विकासका लागि संसदहरूलाई सुदृढ पार्दै’ विषयवस्तुमा आधारित यस संसदीय मञ्चले लोकतान्त्रिक संस्थाहरूको वास्तविक उद्देश्य जनताका आकाङ्क्षालाई सार्थक प्रगतिमा रूपान्तरण गर्नु हो भन्ने मूल मान्यतालाई जोड दिएको छ।

कार्यक्रममा सहभागी प्रतिनिधिहरूले संविधान सदनमा आयोजित सांस्कृतिक साँझमा पनि सहभागिता जनाएको जानकारी सिक्किम विधानसभा सचिवालयले आज विज्ञप्तिमा दिएको छ।

हिन्दुस्थान समाचार / बिशाल