लाहोर, २७ अक्टोबर (हि.स.)। विकेटकिपर तथा ब्याटर मुनीबा अलीले नोभेम्बरमा संयुक्त अरब इमिरेट्सको अजमानमा आयोजना हुने आईसीसी महिला इमर्जिङ नेसन्स ट्रफीमा पाकिस्तानको कप्तानी गर्नेछिन्। नियमित कप्तान फातिमा सना अनुपस्थित रहने भएपछि मुनीबालाई यो जिम्मेवारी सुम्पिएको हो। महिला बिग ब्यास लिगमा पर्थ स्कोर्चर्सका लागि खेल्ने प्रतिबद्धताका कारण फातिमा यस प्रतियोगितामा सहभागी हुने छैनन्।

यस वर्ष दोस्रो पटक मुनीबाले फातिमाको स्थानमा पाकिस्तानको कप्तानी गर्ने अवसर पाएकी हुन्। यसअघि उनले जुलाईमा श्रीलङ्का भ्रमणका क्रममा टी२० अन्तरराष्ट्रिय शृङ्खलामा टोलीको नेतृत्व गरेकी थिइन्। त्यतिबेला फातिमा इङ्ग्ल्याण्डको द हन्ड्रेड प्रतियोगितामा बर्मिङ्घम फिनिक्सका लागि खेलिरहेकी थिइन्। व्यक्तिगत कारणले एसियाली खेलकुदमा सहभागी नभएकी मुनीबा यस प्रतियोगितामार्फत टोलीमा फर्किनेछिन्।

ब्याटर आयशा जफरलाई टोलीको उपकप्तान बनाइएको छ। एसियाली खेलकुदमा सहभागी अलराउन्डर आलिया रियाज र तीव्र गतिका बलर हुमा बिलालले भने टोलीमा स्थान पाएका छैनन्। फातिमाको अनुपस्थितिबाहेक १४ सदस्यीय टोली लगभग त्यही हो, जसले एसियाली खेलकुदअघि महिला एसिया कपमा सहभागिता जनाएको थियो। एसिया कप टोलीमा रहेका वहीदा अख्तर र सदफ शमासले पनि यस पटक टोलीमा स्थान पाएका छन्। यी दुवै खेलाडी एसियाली खेलकुदका लागि छनोट गरिएको टोलीमा थिएनन्।

पाकिस्तानको टोली नोभेम्बर ६ मा लाहोरमा भेला हुनेछ। त्यसपछि नोभेम्बर ७ देखि ९ सम्म तीनदिने प्रशिक्षण शिविर सञ्चालन गरिनेछ। शिविरपछि टोली संयुक्त अरब इमिरेट्सका लागि प्रस्थान गर्नेछ। दस टोली सहभागी हुने यो प्रतियोगिता नोभेम्बर १२ देखि शुरु हुनेछ।

महिला इमर्जिङ नेसन्स ट्रफी २०२६ का लागि पाकिस्तानको टोली: मुनीबा अली (कप्तान), आयशा जफर (उपकप्तान), ईमान नसीर, ऐमन फातिमा, गुल फिरोजा, मोमिना रियासत, नशरा सन्धु, सदफ शमास, साइरा जबीन, शवाल जुल्फिकार, तस्मिया रुबाब, तुबा हसन, उम्म-ए-हानी र वहीदा अख्तर।

हिन्दुस्थान समाचार / बिशाल