मेलबर्न, ०३ अक्टोबर (हि.स.)। अस्ट्रेलियाको भिक्टोरिया राज्यमा शनिबार बिहान ४.८ तीव्रताको भूकम्प गएको छ। भूकम्पको धक्का मेलबर्नसहित राज्यका विभिन्न भागमा महसुस गरिएको छ। जियोसाइन्स अस्ट्रेलियाका अनुसार, भूकम्पको केन्द्रबिन्दु मेलबर्नबाट करिब १३० किलोमिटर दक्षिणपूर्वमा रहेको लियोङ्गाथानजिकै थियो।
ब्रिटेन दैनिक समाचारपत्र ‘द गार्डियन’ का अनुसार, स्थानीय समयअनुसार भूकम्प राति करिब २ः०१ बजी गएको थियो र यसको केन्द्र जमिनबाट करिब १० किलोमिटर तल रहेको थियो। जियोसाइन्स अस्ट्रेलियामा हजारौँ मानिसले भूकम्प महसुस गरेको जानकारी गराएका छन्। मेलबर्नका पूर्वी उपनगरबाहेक प्रेस्टन, हाइडेलबर्ग हाइट्स, भेनस बे तथा छेउछाउका अन्य क्षेत्रमा पनि मानिसहरूले भूकम्पको धक्का महसुस गरेका थिए।
सामाजिक सञ्जालमा मानिसहरूले भूकम्पका कारण निद्रा खुलेको र घरभित्र कम्पन महसुस भएको उल्लेख गरेका छन्। धेरैले फर्निचर तथा घर हल्लिएको जानकारीसमेत साझा गरेका छन्।
भिक्टोरियाको राज्य आपतकालीन सेवाले भूकम्पका क्रममा तल झुक्न, बलियो फर्निचरमुनि लुक्न तथा टाउको र घाँटीलाई सुरक्षित राख्न मानिसहरूलाई सुझाउ दिएको छ। अस्ट्रेलियाको मौसम विभागले भूकम्पका कारण सुनामीको कुनै खतरा नरहेको जनाएको छ। मुख्य भूकम्प गएको करिब ५५ मिनेटपछि ३.१ तीव्रताको परकम्प पनि रेकर्ड गरिएको थियो। विशेषज्ञहरूका अनुसार, आगामी दिन वा सातामा यस क्षेत्रमा थप परकम्प महसुस हुन सक्नेछन्।
मेलबर्न विश्वविद्यालयका भूकम्प विज्ञानका सहप्राध्यापक मार्क क्विग्लीले साउथ गिप्सल्यान्ड अस्ट्रेलियाका तुलनात्मक रूपमा बढी सक्रिय भूकम्पीय क्षेत्रमध्ये एक भएको बताएका छन्। उनका अनुसार, ४.८ तीव्रताको भूकम्पपछि परकम्प आउनु असामान्य होइन। उनले करिब १० किलोमिटरको गहिराइमा चट्टानको एक भागमा अचानक हलचल भएका कारण भूकम्प गएको बताए। भूकम्पीय गतिविधि बढेको भन्ने धारणाका बावजुद पछिल्ला वर्षहरूमा भूकम्पको आवृत्तिमा स्पष्ट वृद्धि नभएको उनले बताए।
साउथ गिप्सल्यान्ड क्षेत्र भूकम्पीय गतिविधिका दृष्टिले सक्रिय मानिन्छ। भिक्टोरियामा २०२१ मा म्यान्सफिल्डनजिकै ५.९ तीव्रताको भूकम्प गएको थियो भने २०२३ मा ग्रेट ओसन रोड क्षेत्रमा ५.० तीव्रताको भूकम्प रेकर्ड गरिएको थियो। शनिबारको ४.८ तीव्रताको भूकम्पलाई २०२३ पछि भिक्टोरियामा रेकर्ड गरिएको सबैभन्दा ठूलो भूकम्प बताइएको छ।
क्विग्लीले मानिसहरूका लागि आफ्नो घरमा ठूला भूकम्पका क्रममा खसेर क्षति पुर्याउन सक्ने वस्तुहरू के-के छन् भनेर जाँच गर्नु उपयोगी हुने बताएका छन्। उनले भूगर्भीय अभिलेखले गिप्सल्यान्डमा विगतमा यसभन्दा निकै शक्तिशाली भूकम्पसमेत गएको देखाउने बताए।
हिन्दुस्थान समाचार / बिशाल
